൭൭. ഉപോസഥഭേദാദി

൧൪൯. അഥ ഖോ ഭിക്ഖൂനം ഏതദഹോസി – ‘‘കതി നു ഖോ ഉപോസഥാ’’തി? ഭഗവതോ ഏതമത്ഥം ആരോചേസും. ദ്വേമേ, ഭിക്ഖവേ, ഉപോസഥാ – ചാതുദ്ദസികോ ച പന്നരസികോ ച. ഇമേ ഖോ, ഭിക്ഖവേ, ദ്വേ ഉപോസഥാതി.

അഥ ഖോ ഭിക്ഖൂനം ഏതദഹോസി – ‘‘കതി നു ഖോ ഉപോസഥകമ്മാനീ’’തി? ഭഗവതോ ഏതമത്ഥം ആരോചേസും. ചത്താരിമാനി, ഭിക്ഖവേ, ഉപോസഥകമ്മാനി – അധമ്മേന വഗ്ഗം ഉപോസഥകമ്മം, അധമ്മേന സമഗ്ഗം ഉപോസഥകമ്മം, ധമ്മേന വഗ്ഗം ഉപോസഥകമ്മം, ധമ്മേന സമഗ്ഗം ഉപോസഥകമ്മന്തി. തത്ര, ഭിക്ഖവേ, യദിദം അധമ്മേന വഗ്ഗം ഉപോസഥകമ്മം, ന, ഭിക്ഖവേ, ഏവരൂപം ഉപോസഥകമ്മം, കാതബ്ബം. ന ച മയാ ഏവരൂപം ഉപോസഥകമ്മം അനുഞ്ഞാതം. തത്ര, ഭിക്ഖവേ, യദിദം അധമ്മേന സമഗ്ഗം ഉപോസഥകമ്മം, ന, ഭിക്ഖവേ, ഏവരൂപം ഉപോസഥകമ്മം കാതബ്ബം. ന ച മയാ ഏവരൂപം ഉപോസഥകമ്മം അനുഞ്ഞാതം. തത്ര, ഭിക്ഖവേ, യദിദം ധമ്മേന വഗ്ഗം ഉപോസഥകമ്മം, ന, ഭിക്ഖവേ, ഏവരൂപം ഉപോസഥകമ്മം കാതബ്ബം. ന ച മയാ ഏവരൂപം ഉപോസഥകമ്മം അനുഞ്ഞാതം. തത്ര, ഭിക്ഖവേ, യദിദം ധമ്മേന സമഗ്ഗം ഉപോസഥകമ്മം, ഏവരൂപം, ഭിക്ഖവേ, ഉപോസഥകമ്മം കാതബ്ബം, ഏവരൂപഞ്ച മയാ ഉപോസഥകമ്മം അനുഞ്ഞാതം. തസ്മാതിഹ, ഭിക്ഖവേ, ഏവരൂപം ഉപോസഥകമ്മം കരിസ്സാമ യദിദം ധമ്മേന സമഗ്ഗന്തി – ഏവഞ്ഹി വോ, ഭിക്ഖവേ, സിക്ഖിതബ്ബന്തി.