൭. പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം

൬൫. [ഇദം വത്ഥു പാചി. ൪൧൭; മ. നി. ൨൩൪ ആദയോ] തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന അരിട്ഠസ്സ നാമ ഭിക്ഖുനോ ഗദ്ധബാധിപുബ്ബസ്സ [ഗന്ധബാധിപുബ്ബസ്സ (ക.)] ഏവരൂപം പാപകം ദിട്ഠിഗതം ഉപ്പന്നം ഹോതി – ‘‘തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി. അസ്സോസും ഖോ സമ്ബഹുലാ ഭിക്ഖൂ അരിട്ഠസ്സ നാമ കിര ഭിക്ഖുനോ ഗദ്ധബാധിപുബ്ബസ്സ ഏവരൂപം പാപകം ദിട്ഠിഗതം ഉപ്പന്നം – ‘‘തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി. അഥ ഖോ തേ ഭിക്ഖൂ യേന അരിട്ഠോ ഭിക്ഖു ഗദ്ധബാധിപുബ്ബോ തേനുപസങ്കമിംസു. ഉപസങ്കമിത്വാ അരിട്ഠം ഭിക്ഖും ഗദ്ധബാധിപുബ്ബം ഏതദവോചും – ‘‘സച്ചം കിര തേ, ആവുസോ അരിട്ഠ, ഏവരൂപം പാപകം ദിട്ഠിഗതം ഉപ്പന്നം – തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി? ‘‘ഏവംബ്യാ ഖോ അഹം, ആവുസോ, ഭഗവതാ ധമ്മം ദേസിതം ആജാനാമി, യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി.

‘‘മാവുസോ അരിട്ഠ, ഏവം അവച. മാ ഭഗവന്തം അബ്ഭാചിക്ഖി. ന ഹി സാധു ഭഗവതോ അബ്ഭക്ഖാനം [അബ്ഭാചിക്ഖനം (ക.)]. ന ഹി ഭഗവാ ഏവം വദേയ്യ. അനേകപരിയായേനാവുസോ അരിട്ഠ, അന്തരായികാ ധമ്മാ അന്തരായികാ വുത്താ ഭഗവതാ. അലഞ്ച പന തേ പടിസേവതോ അന്തരായായ. അപ്പസ്സാദാ കാമാ വുത്താ ഭഗവതാ, ബഹുദുക്ഖാ ബഹുപായാസാ [ബഹൂപായാസാ (സീ. സ്യാ.)], ആദീനവോ ഏത്ഥ ഭിയ്യോ. അട്ഠികങ്കലൂപമാ കാമാ വുത്താ ഭഗവതാ, ബഹുദുക്ഖാ ബഹൂപായാസാ, ആദീനവോ ഏത്ഥ ഭിയ്യോ. മംസപേസൂപമാ കാമാ വുത്താ ഭഗവതാ…പേ… തിണുക്കൂപമാ കാമാ വുത്താ ഭഗവതാ…പേ… അങ്ഗാരകാസൂപമാ കാമാ വുത്താ ഭഗവതാ… സുപിനകൂപമാ കാമാ വുത്താ ഭഗവതാ… യാചിതകൂപമാ കാമാ വുത്താ ഭഗവതാ… രുക്ഖഫലൂപമാ കാമാ വുത്താ ഭഗവതാ… അസിസൂനൂപമാ കാമാ വുത്താ ഭഗവതാ… സത്തിസൂലൂപമാ കാമാ വുത്താ ഭഗവതാ… സപ്പസിരൂപമാ കാമാ വുത്താ ഭഗവതാ, ബഹുദുക്ഖാ ബഹൂപായാസാ, ആദീനവോ ഏത്ഥ ഭിയ്യോ’’തി.

ഏവമ്പി ഖോ അരിട്ഠോ ഭിക്ഖു ഗദ്ധബാധിപുബ്ബോ തേഹി ഭിക്ഖൂഹി വുച്ചമാനോ തഥേവ തം പാപകം ദിട്ഠിഗതം ഥാമസാ പരാമാസാ അഭിനിവിസ്സ വോഹരതി – ‘‘ഏവംബ്യാ ഖോ അഹം, ആവുസോ, ഭഗവതാ ധമ്മം ദേസിതം ആജാനാമി, യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി. യതോ ച ഖോ തേ ഭിക്ഖൂ നാസക്ഖിംസു അരിട്ഠം ഭിക്ഖും ഗദ്ധബാധിപുബ്ബം ഏതസ്മാ പാപകാ ദിട്ഠിഗതാ വിവേചേതും, അഥ ഖോ തേ ഭിക്ഖൂ യേന ഭഗവാ തേനുപസങ്കമിംസു, ഉപസങ്കമിത്വാ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ അരിട്ഠം ഭിക്ഖും ഗദ്ധബാധിപുബ്ബം പടിപുച്ഛി – ‘‘സച്ചം കിര തേ, അരിട്ഠ, ഏവരൂപം പാപകം ദിട്ഠിഗതം ഉപ്പന്നം – തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി? ‘‘ഏവംബ്യാ ഖോ അഹം, ഭന്തേ, ഭഗവതാ ധമ്മം ദേസിതം ആജാനാമി, യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാ’’തി.

‘‘കസ്സ നു ഖോ നാമ ത്വം, മോഘപുരിസ, മയാ ഏവം ധമ്മം ദേസിതം ആജാനാസി? നനു മയാ, മോഘപുരിസ, അനേകപരിയായേന അന്തരായികാ ധമ്മാ അന്തരായികാ വുത്താ? അലഞ്ച പന തേ പടിസേവതോ അന്തരായായ. അപ്പസ്സാദാ കാമാ വുത്താ മയാ, ബഹുദുക്ഖാ ബഹുപായാസാ, ആദീനവോ ഏത്ഥ ഭിയ്യോ. അട്ഠികങ്കലൂപമാ കാമാ വുത്താ മയാ, ബഹുദുക്ഖാ ബഹുപായാസാ, ആദീനവോ ഏത്ഥ ഭിയ്യോ. മംസപേസൂപമാ കാമാ വുത്താ മയാ…പേ… തിണുക്കൂപമാ കാമാ വുത്താ മയാ… അങ്ഗാരകാസൂപമാ കാമാ വുത്താ മയാ… സുപിനകൂപമാ കാമാ വുത്താ മയാ…പേ… യാചിതകൂപമാ കാമാ വുത്താ മയാ… രുക്ഖഫലൂപമാ കാമാ വുത്താ മയാ… അസിസൂനൂപമാ കാമാ വുത്താ മയാ… സത്തിസൂലൂപമാ കാമാ വുത്താ മയാ… സപ്പസിരൂപമാ കാമാ വുത്താ മയാ, ബഹുദുക്ഖാ ബഹുപായാസാ, ആദീനവോ ഏത്ഥ ഭിയ്യോ. അഥ ച പന ത്വം, മോഘപുരിസ, അത്തനാ ദുഗ്ഗഹിതേന [ദുഗ്ഗഹിതേന ദിട്ഠിഗതേന (സ്യാ.)] അമ്ഹേ ചേവ അബ്ഭാചിക്ഖസി, അത്താനഞ്ച ഖണസി, ബഹുഞ്ച അപുഞ്ഞം പസവസി. തഞ്ഹി തേ, മോഘപുരിസ, ഭവിസ്സതി ദീഘരത്തം അഹിതായ ദുക്ഖായ. നേതം, മോഘപുരിസ, അപ്പസന്നാനം വാ പസാദായ…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി – തേന ഹി, ഭിക്ഖവേ, സങ്ഘോ അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരോതു – അസമ്ഭോഗം സങ്ഘേന. ഏവഞ്ച പന ഭിക്ഖവേ കാതബ്ബം – പഠമം അരിട്ഠോ ഭിക്ഖു ചോദേതബ്ബോ, ചോദേത്വാ സാരേതബ്ബോ, സാരേത്വാ ആപത്തിം ആരോപേതബ്ബോ, ആപത്തിം ആരോപേത്വാ ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

൬൬. ‘‘സുണാതു മേ, ഭന്തേ, സങ്ഘോ. അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ ഏവരൂപം പാപകം ദിട്ഠിഗതം ഉപ്പന്നം – തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാതി. സോ തം ദിട്ഠിം ന പടിനിസ്സജ്ജതി. യദി സങ്ഘസ്സ പത്തകല്ലം, സങ്ഘോ അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ – അസമ്ഭോഗം സങ്ഘേന. ഏസാ ഞത്തി.

‘‘സുണാതു മേ, ഭന്തേ, സങ്ഘോ. അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ ഏവരൂപം പാപകം ദിട്ഠിഗതം ഉപ്പന്നം – തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാതി. സോ തം ദിട്ഠിം ന പടിനിസ്സജ്ജതി. സങ്ഘോ അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരോതി – അസമ്ഭോഗം സങ്ഘേന. യസ്സായസ്മതോ ഖമതി അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ കരണം – അസമ്ഭോഗം സങ്ഘേന, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘ദുതിയമ്പി ഏതമത്ഥം വദാമി…പേ… തതിയമ്പി ഏതമത്ഥം വദാമി – സുണാതു മേ, ഭന്തേ, സങ്ഘോ. അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ ഏവരൂപം പാപകം ദിട്ഠിഗതം ഉപ്പന്നം – തഥാഹം ഭഗവതാ ധമ്മം ദേസിതം ആജാനാമി യഥാ യേമേ അന്തരായികാ ധമ്മാ വുത്താ ഭഗവതാ തേ പടിസേവതോ നാലം അന്തരായായാതി. സോ തം ദിട്ഠിം ന പടിനിസ്സജ്ജതി. സങ്ഘോ അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരോതി – അസമ്ഭോഗം സങ്ഘേന. യസ്സായസ്മതോ ഖമതി അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ കരണം – അസമ്ഭോഗം സങ്ഘേന, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘കതം സങ്ഘേന അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം – അസമ്ഭോഗം സങ്ഘേന. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീതി.

‘‘ആവാസപരമ്പരഞ്ച, ഭിക്ഖവേ, സംസഥ – ‘അരിട്ഠോ ഭിക്ഖു ഗദ്ധബാധിപുബ്ബോ, സങ്ഘേന പാപികായ [ഗദ്ധബാധിപുബ്ബോ പാപികായ (സീ. ക.)] ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ – അസമ്ഭോഗം സങ്ഘേനാ’’’തി.

അധമ്മകമ്മദ്വാദസകം

൬൭. ‘‘തീഹി, ഭിക്ഖവേ, അങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം അധമ്മകമ്മഞ്ച ഹോതി, അവിനയകമ്മഞ്ച, ദുവൂപസന്തഞ്ച. അസമ്മുഖാ കതം ഹോതി, അപ്പടിപുച്ഛാ കതം ഹോതി, അപ്പടിഞ്ഞായ കതം ഹോതി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം അധമ്മകമ്മഞ്ച ഹോതി, അവിനയകമ്മഞ്ച, ദുവൂപസന്തഞ്ച.

‘‘അപരേഹിപി, ഭിക്ഖവേ, തീഹങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം അധമ്മകമ്മഞ്ച ഹോതി, അവിനയകമ്മഞ്ച, ദുവൂപസന്തഞ്ച. അനാപത്തിയാ കതം ഹോതി, അദേസനാഗാമിനിയാ ആപത്തിയാ കതം ഹോതി, ദേസിതായ ആപത്തിയാ കതം ഹോതി…പേ… അചോദേത്വാ കതം ഹോതി, അസാരേത്വാ കതം ഹോതി, ആപത്തിം അനാരോപേത്വാ കതം ഹോതി…പേ… അസമ്മുഖാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… അപ്പടിപുച്ഛാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… അപ്പടിഞ്ഞായ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… അനാപത്തിയാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… അദേസനാഗാമിനിയാ ആപത്തിയാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… ദേസിതായ ആപത്തിയാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… അചോദേത്വാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… അസാരേത്വാ കതം ഹോതി, അധമ്മേന കതം ഹോതി, വഗ്ഗേന കതം ഹോതി…പേ… ആപത്തിം അനാരോപേത്വാ കതം ഹോതി, അധമ്മേന കതം ഹോതി, വഗ്ഗേന കതം ഹോതി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം അധമ്മകമ്മഞ്ച ഹോതി, അവിനയകമ്മഞ്ച, ദുവൂപസന്തഞ്ച.

പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മേ

അധമ്മകമ്മദ്വാദസകം നിട്ഠിതം.

ധമ്മകമ്മദ്വാദസകം

൬൮. ‘‘തീഹി, ഭിക്ഖവേ, അങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം ധമ്മകമ്മഞ്ച ഹോതി, വിനയകമ്മഞ്ച, സുവൂപസന്തഞ്ച. സമ്മുഖാ കതം ഹോതി, പടിപുച്ഛാ കതം ഹോതി, പടിഞ്ഞായ കതം ഹോതി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം ധമ്മകമ്മഞ്ച ഹോതി, വിനയകമ്മഞ്ച, സുവൂപസന്തഞ്ച.

‘‘അപരേഹിപി, ഭിക്ഖവേ, തീഹങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം ധമ്മകമ്മഞ്ച ഹോതി, വിനയകമ്മഞ്ച, സുവൂപസന്തഞ്ച. ആപത്തിയാ കതം ഹോതി, ദേസനാഗാമിനിയാ ആപത്തിയാ കതം ഹോതി, അദേസിതായ ആപത്തിയാ കതം ഹോതി…പേ… ചോദേത്വാ കതം ഹോതി, സാരേത്വാ കതം ഹോതി, ആപത്തിം ആരോപേത്വാ കതം ഹോതി…പേ… സമ്മുഖാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… പടിപുച്ഛാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… പടിഞ്ഞായ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… ആപത്തിയാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… ദേസനാഗാമിനിയാ ആപത്തിയാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… അദേസിതായ ആപത്തിയാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… ചോദേത്വാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… സാരേത്വാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി…പേ… ആപത്തിം ആരോപേത്വാ കതം ഹോതി, ധമ്മേന കതം ഹോതി, സമഗ്ഗേന കതം ഹോതി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതം, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം ധമ്മകമ്മഞ്ച ഹോതി, വിനയകമ്മഞ്ച, സുവൂപസന്തഞ്ച.

പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മേ

ധമ്മകമ്മദ്വാദസകം നിട്ഠിതം.

ആകങ്ഖമാനഛക്കം

൬൯. [പരി. ൩൨൩] ‘‘തീഹി, ഭിക്ഖവേ, അങ്ഗേഹി സമന്നാഗതസ്സ ഭിക്ഖുനോ, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ. ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ; ബാലോ ഹോതി അബ്യത്തോ ആപത്തിബഹുലോ അനപദാനോ; ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതസ്സ ഭിക്ഖുനോ, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ.

‘‘അപരേഹിപി, ഭിക്ഖവേ, തീഹങ്ഗേഹി സമന്നാഗതസ്സ ഭിക്ഖുനോ, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ. അധിസീലേ സീലവിപന്നോ ഹോതി, അജ്ഝാചാരേ ആചാരവിപന്നോ ഹോതി, അതിദിട്ഠിയാ ദിട്ഠിവിപന്നോ ഹോതി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതസ്സ ഭിക്ഖുനോ, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ.

‘‘അപരേഹിപി, ഭിക്ഖവേ, തീഹങ്ഗേഹി സമന്നാഗതസ്സ ഭിക്ഖുനോ, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ. ബുദ്ധസ്സ അവണ്ണം ഭാസതി, ധമ്മസ്സ അവണ്ണം ഭാസതി, സങ്ഘസ്സ അവണ്ണം ഭാസതി – ഇമേഹി ഖോ, ഭിക്ഖവേ, തീഹങ്ഗേഹി സമന്നാഗതസ്സ ഭിക്ഖുനോ, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ.

‘‘തിണ്ണം, ഭിക്ഖവേ, ഭിക്ഖൂനം, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ. ഏകോ ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ; ഏകോ ബാലോ ഹോതി അബ്യത്തോ ആപത്തിബഹുലോ അനപദാനോ; ഏകോ ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി – ഇമേസം ഖോ, ഭിക്ഖവേ, തിണ്ണം ഭിക്ഖൂനം, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ.

‘‘അപരേസമ്പി, ഭിക്ഖവേ, തിണ്ണം ഭിക്ഖൂനം, ആകങ്കമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ. ഏകോ അധിസീലേ സീലവിപന്നോ ഹോതി, ഏകോ അജ്ഝാചാരേ ആചാരവിപന്നോ ഹോതി, ഏകോ അതിദിട്ഠിയാ ദിട്ഠിവിപന്നോ ഹോതി – ഇമേസം ഖോ, ഭിക്ഖവേ, തിണ്ണം ഭിക്ഖൂനം, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ.

‘‘അപരേസമ്പി, ഭിക്ഖവേ, തിണ്ണം ഭിക്ഖൂനം, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കരേയ്യ. ഏകോ ബുദ്ധസ്സ അവണ്ണം ഭാസതി, ഏകോ ധമ്മസ്സ അവണ്ണം ഭാസതി, ഏകോ സങ്ഘസ്സ അവണ്ണം ഭാസതി – ഇമേസം ഖോ, ഭിക്ഖവേ, തിണ്ണം ഭിക്ഖൂനം, ആകങ്ഖമാനോ സങ്ഘോ, പാപികായ ദിട്ഠിയാ അപ്പടിനിസ്സഗേ, ഉക്ഖേപനീയകമ്മം കരേയ്യ.

പാപികായ ദിട്ഠിയാ അപ്പടിനിസ്സഗേ ഉക്ഖേപനീയകമ്മേ

ആകങ്ഖമാനഛക്കം നിട്ഠിതം.

തേചത്താലീസവത്തം

൭൦. ‘‘പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മകതേന, ഭിക്ഖവേ, ഭിക്ഖുനാ സമ്മാ വത്തിതബ്ബം. തത്രായം സമ്മാവത്തനാ – ന ഉപസമ്പാദേതബ്ബം, ന നിസ്സയോ ദാതബ്ബോ, ന സാമണേരോ ഉപട്ഠാപേതബ്ബോ, ന ഭിക്ഖുനോവാദകസമ്മുതി സാദിതബ്ബാ, സമ്മതേനപി ഭിക്ഖുനിയോ ന ഓവദിതബ്ബാ. യായ ആപത്തിയാ സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കതം ഹോതി സാ ആപത്തി ന ആപജ്ജിതബ്ബാ, അഞ്ഞാ വാ താദിസികാ, തതോ വാ പാപിട്ഠതരാ; കമ്മം ന ഗരഹിതബ്ബം, കമ്മികാ ന ഗരഹിതബ്ബാ…പേ… ന പകതത്തസ്സ ഭിക്ഖുനോ ഉപോസഥോ ഠപേതബ്ബോ, ന പവാരണാ ഠപേതബ്ബാ, ന സവചനീയം കാതബ്ബം, ന അനുവാദോ പട്ഠപേതബ്ബോ, ന ഓകാസോ കാരേതബ്ബോ, ന ചോദേതബ്ബോ, ന സാരേതബ്ബോ, ന ഭിക്ഖൂഹി സമ്പയോജേതബ്ബ’’ന്തി.

പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മേ

തേചത്താലീസവത്തം നിട്ഠിതം.

൭൧. അഥ ഖോ സങ്ഘോ അരിട്ഠസ്സ ഭിക്ഖുനോ ഗദ്ധബാധിപുബ്ബസ്സ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം അകാസി – അസമ്ഭോഗം സങ്ഘേന. സോ സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ വിബ്ഭമി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ അരിട്ഠോ ഭിക്ഖു ഗദ്ധബാധിപുബ്ബോ സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ വിബ്ഭമിസ്സതീ’’തി? അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും.

അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ഭിക്ഖൂ പടിപുച്ഛി – ‘‘സച്ചം കിര, ഭിക്ഖവേ, അരിട്ഠോ ഭിക്ഖു ഗദ്ധബാധിപുബ്ബോ സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ വിബ്ഭമതീ’’തി [വിബ്ഭമീതി (സീ. ക.)]? ‘‘സച്ചം ഭഗവാ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം…പേ… കഥഞ്ഹി നാമ സോ, ഭിക്ഖവേ, മോഘപുരിസോ സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ വിബ്ഭമിസ്സതി? നേതം, ഭിക്ഖവേ, അപ്പസന്നാനം വാ പസാദായ…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി – ‘‘തേന ഹി, ഭിക്ഖവേ, സങ്ഘോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതു.

നപ്പടിപ്പസ്സമ്ഭേതബ്ബതേചത്താലീസകം

൭൨. ‘‘പഞ്ചഹി, ഭിക്ഖവേ, അങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം നപ്പടിപ്പസ്സമ്ഭേതബ്ബം. ഉപസമ്പാദേതി, നിസ്സയം ദേതി, സാമണേരം ഉപട്ഠാപേതി, ഭിക്ഖുനോവാദകസമ്മുതിം സാദിയതി, സമ്മതോപി ഭിക്ഖുനിയോ ഓവദതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗേ, ഉക്ഖേപനീയകമ്മം നപ്പടിപ്പസ്സമ്ഭേതബ്ബം.

[പരി. ൪൨൦] ‘‘അപരേഹിപി, ഭിക്ഖവേ, പഞ്ചഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം നപ്പടിപ്പസ്സമ്ഭേതബ്ബം. യായ ആപത്തിയാ സങ്ഘേന പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം കതം ഹോതി തം ആപത്തിം ആപജ്ജതി, അഞ്ഞം വാ താദിസികം, തതോ വാ പാപിട്ഠതരം; കമ്മം ഗരഹതി, കമ്മികേ ഗരഹതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം നപ്പടിപ്പസ്സമ്ഭേതബ്ബം…പേ….

‘‘അട്ഠഹി, ഭിക്ഖവേ, അങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം നപ്പടിപ്പസ്സമ്ഭേതബ്ബം. പകതത്തസ്സ ഭിക്ഖുനോ ഉപോസഥം ഠപേതി, പവാരണം ഠപേതി, സവചനീയം കരോതി, അനുവാദം പട്ഠപേതി, ഓകാസം കാരേതി, ചോദേതി, സാരേതി, ഭിക്ഖൂഹി സമ്പയോജേതി – ഇമേഹി ഖോ, ഭിക്ഖവേ, അട്ഠഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം നപ്പടിപ്പസ്സമ്ഭേതബ്ബം.

പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മേ

നപ്പടിപ്പസ്സമ്ഭേതബ്ബതേചത്താലീസകം നിട്ഠിതം.

പടിപ്പസ്സമ്ഭേതബ്ബതേചത്താലീസകം

൭൩. ‘‘പഞ്ചഹി, ഭിക്ഖവേ, അങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതബ്ബം. ന ഉപസമ്പാദേതി, ന നിസ്സയം ദേതി, ന സാമണേരം ഉപട്ഠാപേതി, ന ഭിക്ഖുനോവാദകസമ്മുതിം സാദിയതി, സമ്മതോപി ഭിക്ഖുനിയോ ന ഓവദതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതബ്ബം.

‘‘അപരേഹിപി, ഭിക്ഖവേ, പഞ്ചഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതബ്ബം. യായ ആപത്തിയാ സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം കതം ഹോതി തം ആപത്തിം ന ആപജ്ജതി, അഞ്ഞം വാ താദിസികം, തതോ വാ പാപിട്ഠതരം; കമ്മം ന ഗരഹതി, കമ്മികേ ന ഗരഹതി – ഇമേഹി ഖോ, ഭിക്ഖവേ, പഞ്ചഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതബ്ബം…പേ….

‘‘അട്ഠഹി, ഭിക്ഖവേ, അങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതബ്ബം. ന പകതത്തസ്സ ഭിക്ഖുനോ ഉപോസഥം ഠപേതി, ന പവാരണം ഠപേതി, ന സവചനീയം കരോതി, ന അനുവാദം പട്ഠപേതി, ന ഓകാസം കാരേതി, ന ചോദേതി, ന സാരേതി, ന ഭിക്ഖൂഹി സമ്പയോജേതി – ഇമേഹി ഖോ, ഭിക്ഖവേ, അട്ഠഹങ്ഗേഹി സമന്നാഗതസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതബ്ബം’’.

പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മേ

പടിപ്പസ്സമ്ഭേതബ്ബതേചത്താലീസകം നിട്ഠിതം.

൭൪. ‘‘ഏവഞ്ച പന, ഭിക്ഖവേ, പടിപ്പസ്സമ്ഭേതബ്ബം. തേന, ഭിക്ഖവേ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതേന ഭിക്ഖുനാ സങ്ഘം ഉപസങ്കമിത്വാ ഏകംസം ഉത്തരാസങ്ഗം കരിത്വാ വുഡ്ഢാനം ഭിക്ഖൂനം പാദേ വന്ദിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘അഹം, ഭന്തേ, സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ സമ്മാ വത്താമി, ലോമം പാതേമി, നേത്ഥാരം വത്താമി, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ പടിപ്പസ്സദ്ധിം യാചാമീ’തി. ദുതിയമ്പി യാചിതബ്ബാ. തതിയമ്പി യാചിതബ്ബാ. ബ്യത്തേന ഭിക്ഖുനാ പടിബലേന സങ്ഘോ ഞാപേതബ്ബോ –

‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. യദി സങ്ഘസ്സ പത്തകല്ലം, സങ്ഘോ ഇത്ഥന്നാമസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേയ്യ. ഏസാ ഞത്തി.

‘‘സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. സങ്ഘോ ഇത്ഥന്നാമസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതി. യസ്സായസ്മതോ ഖമതി ഇത്ഥന്നാമസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ പടിപ്പസ്സദ്ധി, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘ദുതിയമ്പി ഏതമത്ഥം വദാമി…പേ… തതിയമ്പി ഏതമത്ഥം വദാമി – സുണാതു മേ, ഭന്തേ, സങ്ഘോ. അയം ഇത്ഥന്നാമോ ഭിക്ഖു സങ്ഘേന, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മകതോ സമ്മാ വത്തതി, ലോമം പാതേതി, നേത്ഥാരം വത്തതി, പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയസ്സ കമ്മസ്സ പടിപ്പസ്സദ്ധിം യാചതി. സങ്ഘോ ഇത്ഥന്നാമസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം പടിപ്പസ്സമ്ഭേതി. യസ്സായസ്മതോ ഖമതി ഇത്ഥന്നാമസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയസ്സ കമ്മസ്സ പടിപ്പസ്സദ്ധി, സോ തുണ്ഹസ്സ; യസ്സ നക്ഖമതി, സോ ഭാസേയ്യ.

‘‘പടിപ്പസ്സദ്ധം സങ്ഘേന ഇത്ഥന്നാമസ്സ ഭിക്ഖുനോ, പാപികായ ദിട്ഠിയാ അപ്പടിനിസ്സഗ്ഗേ, ഉക്ഖേപനീയകമ്മം. ഖമതി സങ്ഘസ്സ, തസ്മാ തുണ്ഹീ, ഏവമേതം ധാരയാമീ’’തി.

പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം നിട്ഠിതം സത്തമം.

കമ്മക്ഖന്ധകോ പഠമോ.

ഇമമ്ഹി ഖന്ധകേ വത്ഥൂ സത്ത.

തസ്സുദ്ദാനം –

പണ്ഡുലോഹിതകാ ഭിക്ഖൂ, സയം ഭണ്ഡനകാരകാ;

താദിസേ ഉപസങ്കമ്മ, ഉസ്സഹിംസു ച ഭണ്ഡനേ.

അനുപ്പന്നാപി ജായന്തി [അനുപ്പന്നാനി ജായന്തി (സീ. സ്യാ.)], ഉപ്പന്നാനിപി വഡ്ഢരേ [ഉപ്പന്നാനി പവഡ്ഢരേ (സീ.), ഉപ്പന്നാപി പവഡ്ഢന്തി (ക.)];

അപ്പിച്ഛാ പേസലാ ഭിക്ഖൂ, ഉജ്ഝായന്തി പദസ്സതോ [പരീസതോ (സ്യാ.), പരസ്സതോ (സീ.)].

സദ്ധമ്മട്ഠിതികോ ബുദ്ധോ, സയമ്ഭൂ അഗ്ഗപുഗ്ഗലോ;

ആണാപേസി തജ്ജനീയകമ്മം സാവത്ഥിയം ജിനോ.

അസമ്മുഖാപ്പടിപുച്ഛാപ്പടിഞ്ഞായ കതഞ്ച യം;

അനാപത്തി അദേസനേ, ദേസിതായ കതഞ്ച യം.

അചോദേത്വാ അസാരേത്വാ, അനാരോപേത്വാ ച യം കതം;

അസമ്മുഖാ അധമ്മേന, വഗ്ഗേന ചാപി [വഗ്ഗേനാപി ച (സീ. സ്യാ.)] യം കതം.

അപ്പടിപുച്ഛാ അധമ്മേന, പുന വഗ്ഗേന [വഗ്ഗേനാപി ച (സീ. സ്യാ.)] യം കതം;

അപ്പടിഞ്ഞായ അധമ്മേന, വഗ്ഗേന ചാപി [വഗ്ഗേനാപി ച (സീ. സ്യാ.)] യം കതം.

അനാപത്തി [അനാപത്തിയാ (സീ. സ്യാ.)] അധമ്മേന, വഗ്ഗേന

ചാപി [വഗ്ഗേനാപി ച (സീ. സ്യാ.)] യം കതം.

അദേസനാഗാമിനിയാ, അധമ്മവഗ്ഗമേവ ച.

ദേസിതായ അധമ്മേന, വഗ്ഗേനാപി തഥേവ ച;

അചോദേത്വാ അധമ്മേന, വഗ്ഗേനാപി തഥേവ ച.

അസാരേത്വാ അധമ്മേന, വഗ്ഗേനാപി തഥേവ ച;

അനാരോപേത്വാ അധമ്മേന, വഗ്ഗേനാപി തഥേവ ച.

കണ്ഹവാരനയേനേവ, സുക്കവാരം വിജാനിയാ;

സങ്ഘോ ആകങ്ഖമാനോ ച യസ്സ തജ്ജനിയം കരേ.

ഭണ്ഡനം ബാലോ സംസട്ഠോ, അധിസീലേ അജ്ഝാചാരേ;

അതിദിട്ഠിവിപന്നസ്സ, സങ്ഘോ തജ്ജനിയം കരേ.

ബുദ്ധധമ്മസ്സ സങ്ഘസ്സ, അവണ്ണം യോ ച ഭാസതി;

തിണ്ണന്നമ്പി ച ഭിക്ഖൂനം, സങ്ഘോ തജ്ജനിയം കരേ.

ഭണ്ഡനം കാരകോ ഏകോ, ബാലോ സംസഗ്ഗനിസ്സിതോ;

അധിസീലേ അജ്ഝാചാരേ, തഥേവ അതിദിട്ഠിയാ.

ബുദ്ധധമ്മസ്സ സങ്ഘസ്സ, അവണ്ണം യോ ച ഭാസതി;

തജ്ജനീയകമ്മകതോ, ഏവം സമ്മാനുവത്തനാ.

ഉപസമ്പദനിസ്സയാ, സാമണേരം ഉപട്ഠനാ;

ഓവാദസമ്മതേനാപി, ന കരേ തജ്ജനീകതോ.

നാപജ്ജേ തഞ്ച ആപത്തിം, താദിസഞ്ച തതോ പരം;

കമ്മഞ്ച കമ്മികേ ചാപി, ന ഗരഹേ തഥാവിധോ.

ഉപോസഥം പവാരണം, പകതത്തസ്സ നട്ഠപേ;

സവചനിം [ന സവചനിയം (സീ. സ്യാ.)] അനുവാദോ, ഓകാസോ ചോദനേന ച.

സാരണം സമ്പയോഗഞ്ച, ന കരേയ്യ തഥാവിധോ;

ഉപസമ്പദനിസ്സയാ, സാമണേരം ഉപട്ഠനാ.

ഓവാദസമ്മതേനാപി, പഞ്ചഹങ്ഗേഹി [പഞ്ചഅങ്ഗോ (ക.)] ന സമ്മതി;

തഞ്ചാപജ്ജതി ആപത്തിം, താദിസഞ്ച തതോ പരം.

കമ്മഞ്ച കമ്മികേ ചാപി, ഗരഹന്തോ ന സമ്മതി;

ഉപോസഥം പവാരണം, സവചനീയാ ച നോവാദോ.

ഓകാസോ ചോദനഞ്ചേവ, സാരണാ സമ്പയോജനാ;

ഇമേഹട്ഠങ്ഗേഹി യോ യുത്തോ, തജ്ജനാനുപസമ്മതി.

കണ്ഹവാരനയേനേവ, സുക്കവാരം വിജാനിയാ;

ബാലോ ആപത്തിബഹുലോ, സംസട്ഠോപി ച സേയ്യസോ.

നിയസ്സകമ്മം സമ്ബുദ്ധോ, ആണാപേസി മഹാമുനി;

കീടാഗിരിസ്മിം ദ്വേ ഭിക്ഖൂ, അസ്സജിപുനബ്ബസുകാ.

അനാചാരഞ്ച വിവിധം, ആചരിംസു അസഞ്ഞതാ;

പബ്ബാജനീയം സമ്ബുദ്ധോ, കമ്മം സാവത്ഥിയം ജിനോ;

മച്ഛികാസണ്ഡേ സുധമ്മോ, ചിത്തസ്സാവാസികോ അഹു.

ജാതിവാദേന ഖുംസേതി, സുധമ്മോ ചിത്തുപാസകം;

പടിസാരണീയകമ്മം, ആണാപേസി തഥാഗതോ.

കോസമ്ബിയം ഛന്നം ഭിക്ഖും, നിച്ഛന്താപത്തിം പസ്സിതും;

അദസ്സനേ ഉക്ഖിപിതും, ആണാപേസി ജിനുത്തമോ.

ഛന്നോ തംയേവ ആപത്തിം, പടികാതും ന ഇച്ഛതി;

ഉക്ഖേപനാപ്പടികമ്മേ, ആണാപേസി വിനായകോ.

പാപദിട്ഠി അരിട്ഠസ്സ, ആസി അഞ്ഞാണനിസ്സിതാ;

ദിട്ഠിയാപ്പടിനിസ്സഗ്ഗേ [ദിട്ഠിഅപ്പടിനിസ്സഗ്ഗേ (ക.)], ഉക്ഖേപം ജിനഭാസിതം.

നിയസ്സകമ്മം പബ്ബജ്ജം [പബ്ബാജം (ക.)], തഥേവ പടിസാരണീ;

അദസ്സനാപ്പടികമ്മേ, അനിസ്സഗ്ഗേ ച ദിട്ഠിയാ.

ദവാനാചാരൂപഘാതി, മിച്ഛാആജീവമേവ ച;

പബ്ബാജനീയകമ്മമ്ഹി, അതിരേകപദാ ഇമേ.

അലാഭാവണ്ണാ ദ്വേ പഞ്ച, ദ്വേ പഞ്ചകാതി നാമകാ [ദ്വേ പഞ്ചകോതി നാമകോ (ക.)];

പടിസാരണീയകമ്മമ്ഹി, അതിരേകപദാ ഇമേ.

തജ്ജനീയം നിയസ്സഞ്ച, ദുവേ കമ്മാപി സാദിസാ [കമ്മേസു സദിസം (ക.)];

പബ്ബജ്ജാ [പബ്ബാജാ (ക.)] പടിസാരീ ച, അത്ഥി പദാതിരിത്തതാ.

തയോ ഉക്ഖേപനാ കമ്മാ, സദിസാ തേ വിഭത്തിതോ;

തജ്ജനീയനയേനാപി, സേസകമ്മം വിജാനിയാതി.

കമ്മക്ഖന്ധകം നിട്ഠിതം.