൯. പരിവത്തനഹാരസമ്പാതവിഭാവനാ

൭൧. യേന യേന വിഭത്തിഹാരസമ്പാതേന സുത്തപ്പദേസത്ഥാ വിഭത്താ, സോ വിഭത്തിഹാരസമ്പാതോ പരിപുണ്ണോ, ‘‘കതമോ പരിവത്തനഹാരസമ്പാതോ’’തി പുച്ഛിതബ്ബത്താ ‘‘തത്ഥ കതമോ പരിവത്തനോ ഹാരസമ്പാതോ’’തിആദി വുത്തം.

‘‘കതമേ സുത്തപ്പദേസത്ഥാ കഥം പരിവത്തേതബ്ബാ’’തി പുച്ഛിതബ്ബത്താ ‘‘തസ്മാ’’തിആദി വുത്തം. യാ ‘‘തസ്മാ…പേ… ഗോചരോ’’തി ഗാഥാ വുത്താ, തായ ഗാഥായ യാ സമഥവിപസ്സനാ നിദ്ധാരിതാ, തായ സമഥവിപസ്സനായ ഭാവിതായ അകുസലാനം നിരോധോ ഫലം പയോജനം ഹോതി, പരിഞ്ഞാതം ദുക്ഖം ഹോതി, സമുദയോ പഹീനോ ഹോതി, മഗ്ഗോ ഭാവിതോ ഹോതീതി പരിവത്തേതബ്ബോ. പടിപക്ഖേന പന സമഥവിപസ്സനായ അഭാവിതായ അകുസലാനം അനിരോധോ, അപരിഞ്ഞാതം ദുക്ഖം, സമുദയോ അപ്പഹീനോ, മഗ്ഗോ അഭാവിതോ ഹോതീതി പരിവത്തേതബ്ബോ.

‘‘ഏത്തകോവ പരിവത്തനഹാരസമ്പാതോ പരിപുണ്ണോ’’തി വത്തബ്ബത്താ ‘‘നിയുത്തോ പരിവത്തനോ ഹാരസമ്പാതോ’’തി വുത്തം. യേന യേന സംവണ്ണനാവിസേസഭൂതേന പരിവത്തനഹാരസമ്പാതേന സുത്തപ്പദേസത്ഥാ പരിവത്തേതബ്ബാ, സോ സോ സംവണ്ണനാവിസേസഭൂതോ പരിവത്തനഹാരസമ്പാതോ നിയുത്തോ യഥാരഹം നീഹരിത്വാ യുജ്ജിതബ്ബോതി അത്ഥോ ഗഹേതബ്ബോതി.

ഇതി പരിവത്തനഹാരസമ്പാതേ സത്തിബലാനുരൂപാ രചിതാ

വിഭാവനാ നിട്ഠിതാ.

പണ്ഡിതേഹി പന…പേ… ഗഹേതബ്ബോതി.