൪. ദാനകഥാവണ്ണനാ

൪൭൯. ഫലദാനഭാവദീപനത്ഥന്തി ഫലദാനസബ്ഭാവദീപനത്ഥം. ഫലദാനം വുത്തം വിയ ഹോതീതി ചിത്തേന ഫലദാനം പധാനഭാവേ വുത്തം വിയ ഹോതീതി അത്ഥോ. അഞ്ഞഥാ ദാനഭാവോതി ന സക്കാ വത്തും. ദാനഭാവോപി ഹി ‘‘ദാനം അനിട്ഠഫല’’ന്തിആദിനാ വുത്തോയേവാതി. തന്നിവാരണത്ഥന്തി ഫലദാനനിവാരണത്ഥം. ഏതന്തി ‘‘ദാനം അനിട്ഠഫല’’ന്തിആദിവചനം. ഭേസജ്ജാദിവസേന ആബാധാനിട്ഠതാ ദേയ്യധമ്മസ്സ അനിട്ഠഫലതാപരിയായോ ദട്ഠബ്ബോ.

കഥം തഥേവ സുത്തം സകവാദിപരവാദിവാദേസു യുജ്ജതീതി ചോദനായ ‘‘ന പന ഏകേനത്ഥേനാ’’തി വുത്തം വിഭാവേതും ‘‘ദേയ്യധമ്മോവ ദാന’’ന്തിആദി വുത്തം. തത്ഥ നിവത്തനപക്ഖേയേവ ഏവ-കാരോ യുത്തോ, ന സാധനപക്ഖേ ദ്വിന്നമ്പി ദാനഭാവസ്സ ഇച്ഛിതത്താ. തേനാഹ ‘‘ചേതസികോവാതി അത്ഥോ ദട്ഠബ്ബോ, ദേയ്യധമ്മോവാ’’തി ച. തേനേവാഹ ‘‘ദ്വിന്നഞ്ഹി ദാനാനന്തിആദി. സങ്കരഭാവമോചനത്ഥന്തി സതിപി ദാനഭാവേ സഭാവസങ്കരമോചനത്ഥം. തേനാഹ ‘‘ചേതസികസ്സാ’’തിആദി.

ദാനകഥാവണ്ണനാ നിട്ഠിതാ.