൪. വിമുച്ചമാനകഥാവണ്ണനാ

൩൬൬. മഗ്ഗക്ഖണേ ചിത്തം ഏകദേസേന വിമുത്തം ഏകദേസേന അവിമുത്തന്തി അയം ‘‘വിമുത്തം വിമുച്ചമാന’’ന്തി ലദ്ധിയാ ദോസോ. തഥാ ഹി വുത്തം ‘‘ഏകദേസം വിമുത്തം, ഏകദേസം അവിമുത്ത’’ന്തി. അട്ഠകഥായഞ്ച ‘‘തഞ്ഹി തദാ സമുച്ഛേദവിമുത്തിയാ വിമുത്തേകദേസേന വിമുച്ചമാനന്തിസ്സ ലദ്ധീ’’തി ദസ്സിതോവായമത്ഥോ. വിപ്പകതനിദ്ദേസേതി വിമുച്ചനകിരിയായ അപരിയോസിതതാനിദ്ദേസേ. യം സന്ധായാഹ ‘‘വിമുത്തം വിമുച്ചമാനന്തി വിപ്പകതഭാവേന വുത്തത്താ’’തി. തേനാതി പരവാദിനാ. വിമുച്ച…പേ… വുത്തം വിമുച്ചമാനസ്സ വിമുത്തഭാവാഭാവതോ, വിമുത്തഭേദേന പന തഥാ വുത്തന്തി അധിപ്പായോ. സതി ച ദോസേ വിപ്പകതനിദ്ദേസേതി ആനേത്വാ യോജേതബ്ബം. ഏകദേസോ വിസേസനം ഹോതി നിപ്പദേസവിമുത്തിയാ അവിച്ഛിന്നതോ. ഫലചിത്തേനാതി പഠമഫലചിത്തേന ഉപ്പന്നേന.

വിമുച്ചമാനകഥാവണ്ണനാ നിട്ഠിതാ.