൧൧. നിരോധകഥാവണ്ണനാ

൩൫൩. യേസം ദ്വിന്നന്തി യേസം ദ്വിന്നം ദുക്ഖസച്ചാനം. ദ്വീഹി നിരോധേഹീതി അപ്പടിസങ്ഖാപടിസങ്ഖാസങ്ഖാതേഹി ദ്വീഹി നിരോധേഹി. തത്ഥ ദുക്ഖാദീനം പടിസങ്ഖാതി പടിസങ്ഖാ, പഞ്ഞാവിസേസോ. തേന വത്തബ്ബോ നിരോധോ പടിസങ്ഖാനിരോധോ. യോ സാസവേഹി ധമ്മേഹി വിസംയോഗോതി വുച്ചതി, യോ പച്ചയവേകല്ലേന ധമ്മാനം ഉപ്പാദസ്സ അച്ചന്തവിബന്ധഭൂതോ നിരോധോ, സോ പടിസങ്ഖായ നവത്തബ്ബതോ അപ്പടിസങ്ഖാനിരോധോ നാമാതി പരവാദിനോ ലദ്ധി. പടിസങ്ഖായ വിനാ നിരുദ്ധാതി പച്ചയവേകല്ലേന അനുപ്പത്തിം സന്ധായ വുത്തം. തേനാഹ ‘‘ന ഉപ്പജ്ജിത്വാ ഭങ്ഗാ’’തി. അനുപ്പാദോപി ഹി നിരോധോതി വുച്ചതി യതോ ‘‘ഇമസ്സുപ്പാദാ ഇദം ഉപ്പജ്ജതീ’’തി ലക്ഖണുദ്ദേസസ്സ പടിലോമേ ‘‘ഇമസ്സ നിരോധാ ഇദം നിരുജ്ഝതീ’’തി ദസ്സിതോ. തേനാതി പടിസങ്ഖായ നിരോധസ്സ ഖണികനിരോധസ്സ ച ഇധ നാധിപ്പേതത്താ.

നിരോധകഥാവണ്ണനാ നിട്ഠിതാ.

ദുതിയവഗ്ഗവണ്ണനാ നിട്ഠിതാ.