൧. നസുത്താഹരണകഥാവണ്ണനാ

൨൮൦. യദിപി പാളിയം ‘‘തയോ മഗ്ഗേ ഭാവേതീ’’തി വുത്തം, മഗ്ഗഭാവനാ പന യാവദേവ കിലേസസമുച്ഛിന്ദനത്ഥാതി ഞത്വാ ‘‘കിച്ചസബ്ഭാവന്തി തീഹി പഹാതബ്ബസ്സ പഹീനത’’ന്തി ആഹ. തത്ഥ തീഹീതി ഹേട്ഠിമേഹി തീഹി അരിയമഗ്ഗേഹി പഹാതബ്ബസ്സ അജ്ഝത്തസംയോജനസ്സ പഹീനതം സമുച്ഛിന്ദനന്തി അത്ഥോ. തം പന കിച്ചന്തി അധോഭാഗിയസംയോജനേസു മഗ്ഗസ്സ പഹാനാഭിസമയകിച്ചം. തേനേവ മഗ്ഗേനാതി അനാഗാമിമഗ്ഗേനേവ. ഏതം ന സമേതീതി ഏവം മഗ്ഗുപ്പാദതോ പഗേവ കാമരാഗബ്യാപാദാ പഹീയന്തീതി ലദ്ധികിത്തനം ഇമിനാ മഗ്ഗസ്സ കിച്ചസബ്ഭാവകഥനേന ന സമേതി ന യുജ്ജതി. തസ്മാതി ഇമിനാ യഥാവുത്തമേവ വിരോധം പച്ചാമസതി. പഹീനാനന്തി വിക്ഖമ്ഭിതാനം. യോ ഹി ഝാനലാഭീ ഝാനേന യഥാവിക്ഖമ്ഭിതേ കിലേസേ മഗ്ഗേന സമുച്ഛിന്ദതി, സോ ഇധാധിപ്പേതോ. തേനാഹ ‘‘ദസ്സനമഗ്ഗേ…പേ… അധിപ്പായോ’’തി.

ജഹതികഥാവണ്ണനാ നിട്ഠിതാ.