൧. ഏകാധിപ്പായകഥാവണ്ണനാ

൯൦൮. ഏക-സദ്ദോ അഞ്ഞത്ഥോപി ഹോതി ‘‘ഇത്ഥേകേ അഭിവദന്തീ’’തിആദീസു വിയ, അഞ്ഞത്തഞ്ചേത്ഥ രാഗാധിപ്പായതോ വേദിതബ്ബം, പുഥുജ്ജനസ്സ പന സഛന്ദരാഗപരിഭോഗഭാവതോ ആഹ ‘‘രാഗാധിപ്പായതോ അഞ്ഞാധിപ്പായോവാതി വുത്തം ഹോതീ’’തി. കോ പന സോ അഞ്ഞാധിപ്പായോതി? കരുണാധിപ്പായോ. തേന വുത്തം ‘‘കരുണാധിപ്പായേന ഏകാധിപ്പായോ’’തി. അയഞ്ച നയോ ഇത്ഥിയാ ജീവിതരക്ഖണത്ഥം കാരുഞ്ഞേന മനോരഥം പൂരേന്തസ്സ ബോധിസത്തസ്സ സംവരവിനാസോ ന ഹോതീതി ഏവംവാദിനം പരവാദിം സന്ധായ വുത്തോ, പണിധാനാധിപ്പായവാദിനം പന സന്ധായ ‘‘ഏകോ അധിപ്പായോതി ഏത്ഥാ’’തിആദി വുത്തം. പുത്തമുഖദസ്സനാധിപ്പായോപി ഏത്ഥേവ സങ്ഗഹം ഗതോതി ദട്ഠബ്ബം. ഏകതോഭാവേതി സഹഭാവേ.

ഏകാധിപ്പായകഥാവണ്ണനാ നിട്ഠിതാ.