൧൦. അനിച്ചതാകഥാവണ്ണനാ

൬൨൮. രൂപാദീനം അനിച്ചതാ രൂപാദികേ സതി ഹോതി, അസതി ന ഹോതീതി ഇമിനാ പരിയായേന തസ്സാ തേഹി സഹ ഉപ്പാദനിരോധോ വുത്തോ, ഉപ്പാദാദീസു തീസു ലക്ഖണേസു അനിച്ചതാവോഹാരോ ഹോതീതി യഥാ തയോ ദണ്ഡേ ഉപാദായ പവത്തോ തിദണ്ഡവോഹാരോ തേസു സബ്ബേസു ഹോതി, ഏവം ജാതിജരാമരണധമ്മോ ന നിച്ചോ അനിച്ചോ, തസ്സ ജാതിആദിപകതിതാ അനിച്ചതാസദ്ദേന വുച്ചതീതി ഉപ്പാദാദീസു ലക്ഖണേസു അനിച്ചതാവോഹാരോ സമ്ഭവതീതി വുത്തം ‘‘തീസു…പേ… ഹോതീ’’തി. വിഭാഗാനുയുഞ്ജനവസേനാതി പഭേദാനുയുഞ്ജനവസേന. തത്ഥ യഥാ ജരാഭങ്ഗവസേന അനിച്ചതാ പാകടാ ഹോതി, ന തഥാ ജാതിവസേനാതി പാളിയം ജരാമരണവസേനേവ അനിച്ചതാവിഭാഗോ ദസ്സിതോതി ദട്ഠബ്ബം.

അനിച്ചതാകഥാവണ്ണനാ നിട്ഠിതാ.

ഏകാദസമവഗ്ഗവണ്ണനാ നിട്ഠിതാ.