൭. സീലംഅചേതസികന്തികഥാവണ്ണനാ

൫൯൦-൫൯൪. ഠിതേന അവിനട്ഠേന. ഉപചയേനാതി സീലഭൂതേന കമ്മൂപചയേന. ‘‘ദാനം അചേതസിക’’ന്തി കഥായം വുത്തനയേനാതി യഥാ ‘‘ന വത്തബ്ബം ചേതസികോ ധമ്മോ ദാനന്തി? ആമന്താ. ദാനം അനിട്ഠഫലന്തി…പേ… തേന ഹി ചേതസികോ ധമ്മോ ദാന’’ന്തി പാളി പവത്താ, ഏവം തദനുസാരേന ‘‘ന വത്തബ്ബം ചേതസികം സീലന്തി? ആമന്താ. സീലം അനിട്ഠഫല’’ന്തിആദിനാ സീലസ്സ ചേതസികഭാവസാധകാനി സുത്തപദാനി ച ആനേത്വാ തദത്ഥദസ്സനവസേന അചേതസികോ രൂപാദിധമ്മോ ആയതിം വിപാകം ദേതി. യദി സോ സീലം ഭവേയ്യ, വിനാ സംവരസമാദാനേന വിനാ വിരതിയാ സീലവാ നാമ സിയാ. യസ്മാ പന സമാദാനചേതനാ വിരതി സംവരോ സീലം, തസ്മാ ‘‘സീലം ഇട്ഠഫലം കന്തഫല’’ന്തിആദിനാ യോജനാ കാതബ്ബാതി ഇമമത്ഥം സന്ധായ വുത്തം ‘‘വുത്തനയേനാ’’തി, വുത്തനയാനുസാരേനാതി അത്ഥോ. യസ്മാ പന പാളിയം യഥാ ‘‘സീലം അചേതസിക’’ന്തി കഥാ ആഗതാ, തഥാ ‘‘ദാനം അചേതസിക’’ന്തി വിസും ആഗതാ കഥാ നത്ഥി, തസ്മാ ‘‘സാ പന കഥാ മഗ്ഗിതബ്ബാ’’തി വുത്തം.

സീലംഅചേതസികന്തികഥാവണ്ണനാ നിട്ഠിതാ.