൩. പഞ്ചവിഞ്ഞാണസമങ്ഗിസ്സമഗ്ഗകഥാവണ്ണനാ

൫൭൬. ലക്ഖണന്തി പഞ്ചവിഞ്ഞാണാനം ഉപ്പന്നാരമ്മണതാദിഅവിതഥേകപ്പകാരതാലക്ഖണം. കാമം മനോവിഞ്ഞാണം അവത്ഥുകമ്പി ഹോതി, സവത്ഥുകത്തേ പന തമ്പി ഉപ്പന്നവത്ഥുകമേവ. തഥാ ഹി പാളിയം ഠപനായം ‘‘ഹഞ്ചി പഞ്ചവിഞ്ഞാണാ ഉപ്പന്നാരമ്മണാ’’ത്വേവ വുത്തം. മനോവിഞ്ഞാണസ്സപി ഉപ്പന്നവത്ഥുകതാപരിയായോ അത്ഥീതി ‘‘പഞ്ച വിഞ്ഞാണാ’’തി അവത്വാ ‘‘ഛ വിഞ്ഞാണാ ഉപ്പന്നവത്ഥുകാ’’തി വുത്തേ ‘‘നോ ച വത രേ വത്തബ്ബേ പഞ്ചവിഞ്ഞാണസമങ്ഗിസ്സ അത്ഥി മഗ്ഗഭാവനാ’’തി വത്തും ന സക്കാതി ദസ്സേന്തോ ആഹ ‘‘ഛ വിഞ്ഞാണാ…പേ… അധിപ്പേത’’ന്തി.

൫൭൭. ‘‘അനിമിത്തം സുഞ്ഞതം അപ്പണിഹിത’’ന്തി നിബ്ബാനസ്സ തേ പരിയായാ. ചക്ഖുവിഞ്ഞാണസ്സ അനിമിത്തഗാഹിഭാവേ സുഞ്ഞതാരമ്മണതാപി സിയാതി വുത്തം ‘‘തദേവ സുഞ്ഞതന്തി അധിപ്പായോ’’തി.

പഞ്ചവിഞ്ഞാണസമങ്ഗിസ്സമഗ്ഗകഥാവണ്ണനാ നിട്ഠിതാ.