൧. നയമാതികാവണ്ണനാ

൧. ചുദ്ദസവിധേനാതി ചുദ്ദസപ്പകാരേന, ചുദ്ദസഹി പദേഹീതി അത്ഥോ. തത്ഥ ‘‘സങ്ഗഹോ അസങ്ഗഹോ’’തി ഇദമേകം പദം, തഥാ ‘‘സമ്പയോഗോ വിപ്പയോഗോ’’തി. ‘‘സങ്ഗഹിതേന സമ്പയുത്തം വിപ്പയുത്ത’’ന്തിആദീനി പന തീണി തീണി പദാനി ഏകേകം പദം. ഇതരേസു പദവിഭാഗോ സുവിഞ്ഞേയ്യോവ. ഏതേഹീതി സങ്ഗഹാദിപ്പകാരേഹി. നയനം പാപനം, തം പന പവത്തനം ഞാപനഞ്ച ഹോതീതി ‘‘പവത്തീയതി ഞായന്തീ’’തി ച ദ്വിധാപി അത്ഥോ വുത്തോ. നയാ ഏവ ഉദ്ദിസിയമാനാ മാതികാ. അത്ഥദ്വയേപി പവത്തനഞാണകിരിയാനം കരണഭാവേന സങ്ഗഹാദിപ്പകാരാ നയാതി വുത്താ. തേനാഹ അട്ഠകഥായം ‘‘ഇമിനാ സങ്ഗഹാദികേന നയേനാ’’തി (ധാതു. അട്ഠ. ൧). പദാനന്തി അത്ഥദീപകാനം വചനാനം. പജ്ജതി ഏതേന അത്ഥോതി ഹി പദം. പദാനന്തി ച സംസാമിസമ്ബന്ധേ സാമിവചനം, പകരണസ്സാതി പന അവയവാവയവീസമ്ബന്ധേ.