൧. കോസിയസിക്ഖാപദവണ്ണനാ

൫൪൨. പാളിയം ‘‘കോസിയകാരകേ’’തി ഏത്ഥ കോസം കരോന്തീതി കോസകാരകാതി ലദ്ധവോഹാരാനം പാണകാനം കോസതോ നിബ്ബത്തം കോസിയം, തം കരോന്തീതി കോസിയകാരകാ, തന്തവായാ. സംഹനനം സങ്ഘാതോ, വിനാസോതി അത്ഥോ. കോസിയമിസ്സകന്തി കോസിയതന്തുനാ മിസ്സം. ‘‘അവായിമ’’ന്തി വുത്തത്താ വായിത്വാ ചേ കരോന്തി, അനാപത്തി. അനാപത്തി വിതാനം വാതിആദിനാ വിതാനാദീനം അത്ഥായ കരണേപി തേനാകാരേന പരിഭോഗേപി അനാപത്തി വുത്താ.

ഏവമ്പി മിസ്സേത്വാ കതമേവ ഹോതീതി ഇമിനാ വാതേന ആഹരിത്വാ പാതിതേപി അചിത്തകത്താ ആപത്തിയേവാതി ദസ്സേതി. കോസിയമിസ്സകതാ, അത്തനോ അത്ഥായ സന്ഥതസ്സ കരണം കാരാപനം, പടിലാഭോ ചാതി ഇമാനേത്ഥ തീണി അങ്ഗാനി.

കോസിയസിക്ഖാപദവണ്ണനാ നിട്ഠിതാ.

൫൪൭. സുദ്ധകാളകസിക്ഖാപദം ഉത്താനത്ഥമേവ.