ഉപോസഥാദിപുച്ഛാവിസ്സജ്ജനാവണ്ണനാ

൩൩൨. ‘‘സങ്ഘം, ഭന്തേ, പവാരേമീതിആദി പവാരണാകഥാ നാമാ’’തി ഗണ്ഠിപദേസു വുത്തം.

അത്ഥവസപകരണവണ്ണനാ

൩൩൪. പഠമപാരാജികവണ്ണനായമേവ വുത്തന്തി ‘‘സങ്ഘസുട്ഠുതായാ’’തിആദീനം അത്ഥവണ്ണനം സന്ധായ വുത്തം. ദസക്ഖത്തും യോജനായ പദസതം വുത്തന്തി ഏകമൂലകനയേ ദസക്ഖത്തും യോജനായ കതായ സങ്ഖലികനയേ വുത്തപദേഹി സദ്ധിം പദസതം വുത്തന്തി ഏവമത്ഥോ ഗഹേതബ്ബോ. അഞ്ഞഥാ ഏകമൂലകേ ഏവ നയേ ന സക്കാ പദസതം ലദ്ധും. ഏകമൂലകനയേഹി പുരിമപച്ഛിമപദാനി ഏകതോ കത്വാ ഏകേകസ്മിം വാരേ നവ നവ പദാനി വുത്താനീതി ദസക്ഖത്തും യോജനായ നവുതി പദാനിയേവ ലബ്ഭന്തി. തസ്മാ താനി നവുതി പദാനി സങ്ഖലികനയേ ബദ്ധചക്കവസേന യോജിതേ ദസ പദാനി ലബ്ഭന്തീതി തേഹി സദ്ധിം പദസതന്തി സക്കാ വത്തും. ഇതോ അഞ്ഞഥാ പന ഉഭോസുപി നയേസു വിസും വിസും അത്ഥസതം ധമ്മസതഞ്ച യഥാ ലബ്ഭതി, തഥാ പഠമപാരാജികസംവണ്ണനായമേവ അമ്ഹേഹി ദസ്സിതം, തം തത്ഥ വുത്തനയേനേവ ഗഹേതബ്ബം. പുരിമപച്ഛിമപദാനി ഏകത്തേന ഗഹേത്വാ ‘‘പദസത’’ന്തി വുത്തത്താ ‘‘തത്ഥ പച്ഛിമസ്സ പച്ഛിമസ്സ പദസ്സ വസേന അത്ഥസതം, പുരിമസ്സ പുരിമസ്സ വസേന ധമ്മസത’’ന്തി വുത്തം. തസ്മിം പദസതേ ‘‘സങ്ഘസുട്ഠൂ’’തിആദിനാ വുത്തപുരിമപദാനം വസേന ധമ്മസതം, ‘‘സങ്ഘഫാസൂ’’തിആദിനാ വുത്തപച്ഛിമപദാനം വസേന അത്ഥസതന്തി അധിപ്പായോ.

മഹാവഗ്ഗവണ്ണനാ നിട്ഠിതാ.