൯. പണീതഭോജനസിക്ഖാപദവണ്ണനാ

൨൫൭-൨൫൯. നവമേ പണീതസംസട്ഠാനി ഭോജനാനി പണീതഭോജനാനി. യഥാ ഹി ആജഞ്ഞയുത്തോ രഥോ ‘‘ആജഞ്ഞരഥോ’’തി വുച്ചതി, ഏവമിധാപി പണീതസംസട്ഠാനി സത്തധഞ്ഞനിബ്ബത്താനി ഭോജനാനി ‘‘പണീതഭോജനാനീ’’തി വുത്താനി. യേഹി പന പണീതേഹി സംസട്ഠാനി, താനി ‘‘പണീതഭോജനാനീ’’തി വുച്ചന്തി, തേസം പഭേദദസ്സനത്ഥം ‘‘സേയ്യഥിദം, സപ്പി നവനീത’’ന്തിആദി പാളിയം വുത്തം. ‘‘യേസം മംസം കപ്പതീ’’തി ഇദഞ്ച പാചിത്തിയവത്ഥുപരിച്ഛേദദസ്സനത്ഥം വുത്തം, ന പന കപ്പിയവത്ഥുപരിച്ഛേദദസ്സനത്ഥം. ന ഹി അകപ്പിയമംസസത്താനം സപ്പിആദീനി ന കപ്പന്തി. ഏകഞ്ഹി മനുസ്സവസാതേലം ഠപേത്വാ സബ്ബേസം ഖീരസപ്പിനവനീതവസാതേലേസു അകപ്പിയം നാമ നത്ഥി. സപ്പിഭത്തന്തി ഏത്ഥ കിഞ്ചാപി സപ്പിസംസട്ഠം ഭത്തം സപ്പിഭത്തം, സപ്പി ച ഭത്തഞ്ച സപ്പിഭത്തന്തിപി വിഞ്ഞായതി, അട്ഠകഥാസു പന ‘‘സാലിഭത്തം വിയ സപ്പിഭത്തം നാമ നത്ഥീ’’തി കാരണം വത്വാ ദുക്കടസ്സേവ ദള്ഹതരം കത്വാ വുത്തത്താ ന സക്കാ അഞ്ഞം വത്തും. അട്ഠകഥാചരിയാ ഏവ ഹി ഈദിസേസു ഠാനേസു പമാണം.

മൂലന്തി കപ്പിയഭണ്ഡം സന്ധായ വുത്തം. അനാപത്തീതി വിസങ്കേതത്താ സബ്ബാഹിയേവ ആപത്തീഹി അനാപത്തി. കേചി പന ‘‘പാചിത്തിയേനേവ അനാപത്തി വുത്താ, സൂപോദനവിഞ്ഞത്തിദുക്കടം പന ഹോതിയേവാ’’തി വദന്തി, തം ന ഗഹേതബ്ബം. കപ്പിയസപ്പിനാ അകപ്പിയസപ്പിനാതി ച ഇദം കപ്പിയാകപ്പിയമംസാനം വസേന വുത്തം, തസ്മാ കപ്പിയമംസസപ്പിനാ അകപ്പിയമംസസപ്പിനാതി ഏവമേത്ഥ അത്ഥോ ഗഹേതബ്ബോ. നാനാവത്ഥുകാനീതി സപ്പിനവനീതാദീനം വസേന വുത്തം.

൨൬൧. മഹാനാമസിക്ഖാപദേന കാരേതബ്ബോതി ഏത്ഥ –

‘‘അഗിലാനേന ഭിക്ഖുനാ ചതുമാസപച്ചയപവാരണാ സാദിതബ്ബാ അഞ്ഞത്ര പുനപവാരണായ അഞ്ഞത്ര നിച്ചപവാരണായ, തതോ ചേ ഉത്തരി സാദിയേയ്യ, പാചിത്തിയ’’ന്തി (പാചി. ൩൦൬) –

ഇദം മഹാനാമസിക്ഖാപദം നാമ. ഇമിനാ ച സിക്ഖാപദേന സങ്ഘവസേന ഗിലാനപച്ചയപവാരണായ പവാരിതട്ഠാനേ സചേ തത്ഥ രത്തീഹി വാ ഭേസജ്ജേഹി വാ പരിച്ഛേദോ കതോ ഹോതി, ഏത്തകായേവ രത്തിയോ ഏത്തകാനി വാ ഭേസജ്ജാനി വിഞ്ഞാപേതബ്ബാനീതി. അഥ തതോ രത്തിപരിയന്തതോ വാ ഭേസജ്ജപരിയന്തതോ വാ ഉത്തരി ന ഭേസജ്ജകരണീയേന വാ ഭേസജ്ജം അഞ്ഞഭേസജ്ജകരണീയേന വാ അഞ്ഞം ഭേസജ്ജം വിഞ്ഞാപേന്തസ്സ പാചിത്തിയം വുത്തം. തസ്മാ അഗിലാനോ ഗിലാനസഞ്ഞീ ഹുത്വാ പഞ്ച ഭേസജ്ജാനി വിഞ്ഞാപേന്തോ ന ഭേസജ്ജകരണീയേന ഭേസജ്ജം വിഞ്ഞാപേന്തോ നാമ ഹോതീതി ‘‘മഹാനാമസിക്ഖാപദേന കാരേതബ്ബോ’’തി വുത്തം. ഏതാനി പാടിദേസനീയവത്ഥൂനീതി പാളിയം ആഗതസപ്പിആദീനി സന്ധായ വുത്തം. പാളിയം അനാഗതാനി പന അകപ്പിയസപ്പിആദീനി ഭിക്ഖുനീനമ്പി ദുക്കടവത്ഥൂനീതി വേദിതബ്ബം. സൂപോദനവിഞ്ഞത്തിയന്തി ഭിക്ഖൂനം പാചിത്തിയവത്ഥൂനി ഭിക്ഖുനീനം പാടിദേസനീയവത്ഥൂനി ച ഠപേത്വാ അവസേസവിഞ്ഞത്തിം സന്ധായ വുത്തം. സേസമേത്ഥ ഉത്താനമേവ. പണീതഭോജനതാ, അഗിലാനതാ, അകതവിഞ്ഞത്തിയാ പടിലാഭോ, അജ്ഝോഹരണന്തി ഇമാനി പനേത്ഥ ചത്താരി അങ്ഗാനി.

പണീതഭോജനസിക്ഖാപദവണ്ണനാ നിട്ഠിതാ.