സിക്ഖാകരണീയകഥാവണ്ണനാ
൨൪൩൮. പാടിദേസനീയാനന്തരം ഉദ്ദിട്ഠാനി പഞ്ചസത്തതി സേഖിയാനി മഹാവിഭങ്ഗേ വുത്തവിനിച്ഛയാനേവാതി തദേവ അതിദിസന്തോ ആഹ ‘‘സേഖിയാ പന യേ ധമ്മാ’’തിആദി. യേ പന പഞ്ചസത്തതി സേഖിയാ ധമ്മാ പാടിദേസനീയാനന്തരം ഉദ്ദിട്ഠാ, തേസം അത്ഥവിനിച്ഛയോ മഹാവിഭങ്ഗേ വുത്തോവാതി യോജനാ, അത്ഥികേഹി തതോവ ഗഹേതബ്ബോ, ന പുന ഇധ ദസ്സേസ്സാമീതി അധിപ്പായോ.
ഇതി വിനയത്ഥസാരസന്ദീപനിയാ വിനയവിനിച്ഛയവണ്ണനായ
സിക്ഖാകരണീയകഥാവണ്ണനാ നിട്ഠിതാ.
൨൪൩൯-൪൦. സവിഭങ്ഗാനം ഉഭതോവിഭങ്ഗസഹിതാനം ഉഭതോപാതിമോക്ഖാനം ഭിക്ഖൂനം, ഭിക്ഖുനീനഞ്ച പാതിമോക്ഖാനം അട്ഠകഥാസാരോ സബ്ബട്ഠകഥാനം സാരഭൂതോ യോ സോ അത്ഥോ വിസേസതോ സമന്തപാസാദികായം വുത്തോ. തം സബ്ബം സാരഭൂതം അത്ഥം സമാദായ യോ വിനയസ്സവിനിച്ഛയോ ഭിക്ഖൂനം, ഭിക്ഖുനീനഞ്ച ഹിതത്ഥായ മയാ കതോ വിരചിതോതി സമ്ബന്ധോ.
൨൪൪൧. നോ അമ്ഹാകം പടിഭാണജം പടിഭാണതോ ജാതം ഇമം തു ഇമം വിനയവിനിച്ഛയം പന യേ ജന്തുനോ സത്താ സുണന്തി, തേ ജന്തുനോ ജനസ്സ സത്തലോകസ്സ ഹിതേ അധിസീലസിക്ഖാപകാസകത്താ ഉപകാരകേ സുമതസ്സ സോഭണന്തി ബുദ്ധാദീഹി മതസ്സ, സോഭണേഹി വാ ബുദ്ധാദീഹി മതസ്സ പടിവിദ്ധസ്സ അമതമഹാനിബ്ബാനസ്സ അയനേ അഞ്ജസഭൂതേ ജനസ്സ തായനേ കായികവാചസികവീതിക്കമപടിപക്ഖത്താ അപായഭയനിവാരണട്ഠേന താണഭൂതേ വിനയേ വിനയപിടകേ പകതഞ്ഞുനോ യഥാസഭാവം ജാനന്താ തഞ്ഞുനോ ഭവന്തി തം തം കപ്പിയാകപ്പിയം സേവിതബ്ബാസേവിതബ്ബം ജാനന്താ ഭവന്തേവാതി അത്ഥോ.
൨൪൪൨. ബഹവോ സാരഭൂതാ നയാ ഏത്ഥാതി ബഹുസാരനയോ, തസ്മിം ബഹുസാരനയേ. പരമേ ഉത്തമേ വിനയേ വിനയപിടകേ വിസാരദതം വേസാരജ്ജം അസംഹീരഞാണം അഭിപത്ഥയതാ വിസേസതോ ഇച്ഛന്തേന ബുദ്ധിമതാ ഞാണാതിസയമന്തേന യതിനാ സബ്ബകാലം തിവിധസിക്ഖാപരിപൂരണേ അസിഥിലപവത്തസമ്മാവായാമേന ഭിക്ഖുനാ ഇമസ്മിം വിനയവിനിച്ഛയേ പരമാ ഉത്തരിതരാ മഹതീ ആദരതാ കരണീയതമാ വിസേസേന കാതബ്ബായേവാതി അത്ഥോ.
൨൪൪൩. ഇച്ചേവം സീലവിസുദ്ധിസാധനേ വിനയപിടകേ വേസാരജ്ജഹേതുതായ ഇമസ്സ വിനയവിനിച്ഛയസ്സ സീലവിസുദ്ധിആദിസത്തവിസുദ്ധിപരമ്പരായ അധിഗന്തബ്ബസ്സ അമതമഹാനിബ്ബാനസ്സ പത്തിയാപി മൂലഭൂതതം ദസ്സേതുമാഹ ‘‘അവഗച്ഛതീ’’തിആദി.
യോ പന ഭിക്ഖു അത്ഥയുത്തം മഹതാ പയോജനത്ഥേന, അഭിധേയ്യത്ഥേന ച സമന്നാഗതം ഇമം വിനയസ്സവിനിച്ഛയം അവഗച്ഛതി അവേച്ച യാഥാവതോ ജാനാതി, സോ അപരമ്പരം മരണാഭാവാ അമരം ജരായാഭാവാ അജരം രാഗാദികിലേസരജപടിപക്ഖത്താ അരജം അനേകപ്പകാരരോഗാനം അപ്പവത്തിഹേതുത്താ അരുജം സന്തിപദം സബ്ബകിലേസദരഥപരിളാഹാനം വൂപസമഹേതുത്താ സന്തിസങ്ഖാതം നിബ്ബാനപദം അധിഗച്ഛതി സീലവിസുദ്ധിആദിസത്തവിസുദ്ധിപരമ്പരായ ഗന്ത്വാ പടിവിജ്ഝതീതി യോജനാ.
ഇതി വിനയത്ഥസാരസന്ദീപനിയാ വിനയവിനിച്ഛയവണ്ണനായ
ഭിക്ഖുനിവിഭങ്ഗകഥാവണ്ണനാ നിട്ഠിതാ.