ഖന്ധകപുച്ഛാവാരോ

പുച്ഛാവിസ്സജ്ജനാവണ്ണനാ

൩൨൦. ഉപസമ്പദക്ഖന്ധകന്തി പബ്ബജ്ജാഖന്ധകം (മഹാവ. ൮൪). സഹ നിദ്ദേസേനാതി സനിദ്ദേസം. ‘‘സന്നിദ്ദേസ’’ന്തി വാ പാഠോ, സോ ഏവത്ഥോ. നിദാനേന ച നിദ്ദേസേന ച സദ്ധിന്തി ഏത്ഥ പഞ്ഞത്തിട്ഠാനപുഗ്ഗലാദിപ്പകാസകം നിദാനവചനം നിദാനം നാമ, തന്നിദാനം പടിച്ച നിദ്ദിട്ഠസിക്ഖാപദാനി നിദ്ദേസോ നാമ, തേഹി അവയവഭൂതേഹി സഹിതം തംസമുദായഭൂതം ഖന്ധകം പുച്ഛാമീതി അത്ഥോ. ഉത്തമാനി പദാനീതി ആപത്തിപഞ്ഞാപകാനി വചനാനി അധിപ്പേതാനി. തേസം…പേ… കതി ആപത്തിയോ ഹോന്തീതി തേഹി വചനേഹി പഞ്ഞത്താ കതി ആപത്തിക്ഖന്ധാ ഹോന്തീതി അത്ഥോ. നനു ആപത്തിയോ നാമ പുഗ്ഗലാനഞ്ഞേവ ഹോന്തി, ന പദാനം, കസ്മാ പന ‘‘സമുക്കട്ഠപദാനം കതി ആപത്തിയോ’’തി സാമിവസേന നിദ്ദേസോ കതോതി ആഹ ‘‘യേന യേന ഹി പദേനാ’’തിആദി. പാളിയം ഉപോസഥന്തിആദി ഉപോസഥക്ഖന്ധകാദീനഞ്ഞേവ (മഹാവ. ൧൩൨ ആദയോ) ഗഹണം.

പുച്ഛാവിസ്സജ്ജനാവണ്ണനാ നിട്ഠിതാ.