൪. ദുട്ഠുല്ലസിക്ഖാപദവണ്ണനാ

൩൯൯. ചതുത്ഥേ ആപത്തിം ആപജ്ജതിയേവാതി ധുരനിക്ഖേപപക്ഖേ വുത്തം. വത്ഥുപുഗ്ഗലോതി ആപന്നപുഗ്ഗലോ. ഛാദേതുകാമതായ ഹി സതി ഏവ അവസ്സം അഞ്ഞസ്സ ആരോചനം വുത്തം, വത്ഥുപുഗ്ഗലസ്സ ച ആരോചനാ നാമ ന ഹോതീതി പടിച്ഛാദനമേവാതി അധിപ്പായോ. കോടി ഛിന്നാ ഹോതീതി ഛാദേസ്സാമീതി ധുരനിക്ഖേപേ സതിപി പുഗ്ഗലപരമ്പരായ ഗച്ഛന്തീ ആപത്തികോടി ഛിജ്ജതി.

൪൦൦. ‘‘അനുപസമ്പന്നസ്സ സുക്കവിസ്സട്ഠി ച കായസംസഗ്ഗോ ചാതി അയം ദുട്ഠുല്ലഅജ്ഝാചാരോ നാമാ’’തി ഇദം ദുട്ഠുല്ലാരോചനസിക്ഖാപദട്ഠകഥായം ‘‘അനുപസമ്പന്നസ്സ…പേ… ആദിതോ പഞ്ച സിക്ഖാപദാനി ദുട്ഠുല്ലോ നാമ അജ്ഝാചാരോ, സേസാനി അദുട്ഠുല്ലോ. സുക്കവിസ്സട്ഠികായസംസഗ്ഗദുട്ഠുല്ലഅത്തകാമാ പനസ്സ അജ്ഝാചാരോ നാമാ’’തി (പാചി. അട്ഠ. ൮൨) ഇമിനാ വചനേന വിരുജ്ഝതീതി വീമംസിതബ്ബം. പുഗ്ഗലപേമേന ഛാദയതോ ചേത്ഥ ‘‘അഞ്ഞേ ഗരഹിസ്സന്തീ’’തി ഭയവസേന ഛാദനക്ഖണേ പടിഘോവ ഉപ്പജ്ജതീതി ‘‘ദുക്ഖവേദന’’ന്തി വുത്തന്തി ദട്ഠബ്ബം. ഉപസമ്പന്നസ്സ ദുട്ഠുല്ലാപത്തിജാനനം, പടിച്ഛാദേതുകാമതായ ധുരനിക്ഖേപോതി ദ്വേ അങ്ഗാനി.

ദുട്ഠുല്ലസിക്ഖാപദവണ്ണനാ നിട്ഠിതാ.