൧൨. ദുബ്ബചസിക്ഖാപദവണ്ണനാ

൪൨൪. ദ്വാദസമേ വമ്ഭനവചനന്തി ഗരഹവചനം. സട-സദ്ദോ പതിതസദ്ദേന സമാനത്ഥോ, തസ്സ ച വിസേസനസ്സ പരനിപാതോതി ആഹ ‘‘തത്ഥ തത്ഥ പതിതം തിണകട്ഠപണ്ണ’’ന്തി. കേനാപീതി വാതാദിസദിസേന ഉപജ്ഝായാദിനാ.

൪൨൬. ചിത്തപരിയോനാഹോ ദള്ഹകോധോവ ഉപനാഹോ. തതോപി ബലവതരോ ദുമ്മോചനീയോ കോധാഭിസങ്ഗോ. ചോദകം പടിപ്ഫരണതാതി ചോദകസ്സ പടിവിരുദ്ധോ ഹുത്വാ അവട്ഠാനം. ചോദകം അപസാദനാതി വാചായ ഘട്ടനാ. പച്ചാരോപനാതി ‘‘ത്വമ്പി സാപത്തികോ’’തി ചോദകസ്സ ആപത്തിആരോപനാ. പടിചരണതാതി പടിച്ഛാദനതാ. അപദാനേനാതി അത്തനോ ചരിയായ. ന സമ്പായനതാതി ‘‘യം ത്വം ചോദകോ വദേസി ‘മയാ ഏസ ആപത്തിം ആപന്നോ ദിട്ഠോ’തി, ത്വം തസ്മിം സമയേ കിം കരോസി, അയം കിം കരോതി, കത്ഥ ച ത്വം അഹോസി, കത്ഥ അയ’’ന്തിആദിനാ നയേന ചരിയം പുട്ഠേന സമ്പാദേത്വാ അകഥനം.

‘‘യസ്സ സിയാ ആപത്തീ’’തി (മഹാവ. ൧൩൪) ഇമിനാ നിദാനവചനേന സബ്ബാപി ആപത്തിയോ സങ്ഗഹിതാതി ആഹ ‘‘യസ്സ സിയാ’’തിആദി. അങ്ഗാനി ചേത്ഥ പഠമസങ്ഘഭേദസദിസാനി, അയം പന വിസേസോ യഥാ തത്ഥ ഭേദായ പരക്കമനം, ഇധ അവചനീയകരണതാ ദട്ഠബ്ബാ.

ദുബ്ബചസിക്ഖാപദവണ്ണനാ നിട്ഠിതാ.