൬. ആരാമവഗ്ഗവണ്ണനാ

൧൦൨൧. പഠമസിക്ഖാപദം ഉത്താനത്ഥമേവ.

൨. ദുതിയസിക്ഖാപദവണ്ണനാ

൧൦൩൦. ഭിക്ഖുനീ ചേ ഭിക്ഖും അക്കോസതി, ഇമിനാ സിക്ഖാപദേന പാചിത്തിയം. ഭിക്ഖുനിം ചേ അക്കോസതി, ഓമസവാദേന ആപജ്ജതി. ഓമസവാദേ സമ്മുഖാവ രുഹതി, ഇധ പന പരമ്മുഖാപി.

തത്രായം വിചാരണാ – ഭിക്ഖുവിഭങ്ഗേ ഓസമവാദസിക്ഖാപദേ ഭിക്ഖുനീ അനുപസമ്പന്നട്ഠാനേ തിട്ഠതീതി കത്വാ ഭിക്ഖുനിവിഭങ്ഗേപി ഓമസവാദസിക്ഖാപദേ ഭിക്ഖു ഭിക്ഖുനിയാ അനുപസമ്പന്നട്ഠാനേ തിട്ഠതീതി സിദ്ധം. ഇധ ച അനുപസമ്പന്നസ്സ അക്കോസനേ ദുക്കടം വുത്തം, ഭിക്ഖുസ്സ ഉപസമ്പന്നസ്സ അക്കോസനേ പാചിത്തിയം വുത്തം, തസ്മാ ഇമാനി ദ്വേ സിക്ഖാപദാനി ഭിക്ഖുമ്ഹി സംസന്ദിയമാനാനി അഞ്ഞമഞ്ഞം ന സമേന്തി. യഥാ സമേന്തി, തഥാ ജാനിതബ്ബം. തത്ഥ പോരാണഗണ്ഠിപദേ വുത്തനയേന ഭിക്ഖുനീനം ഓമസവാദസിക്ഖാപദേ അനുപസമ്പന്നോതി ന ഗഹേതബ്ബോ, ഇദമേത്ഥ യുത്തം. പരിഭാസേയ്യാതി അഞ്ഞത്ര അക്കോസവത്ഥൂഹി. തേസു ഹി അഞ്ഞതരസ്മിം സതി ഓമസവാദപാചിത്തിയമേവാതി ഏകേ, തം ന യുത്തം. ഓമസവാദേ പാളിമുത്തകഅക്കോസേ ഹി ദുക്കടം ഹോതീതി. ദുക്കടോകാസേ ഇദം പാചിത്തിയം തേഹി നിദ്ദിട്ഠം ഹോതി, തസ്മാ ‘‘ബാലാ ഏതാ’’തി പാളിയം ഇധ ആഗതപദാനംയേവ വസേന പരിഭാസനം വേദിതബ്ബം.

ദുതിയസിക്ഖാപദവണ്ണനാ നിട്ഠിതാ.

൧൦൩൩. തതിയസിക്ഖാപദം ഉത്താനത്ഥമേവ.

൪. ചതുത്ഥസിക്ഖാപദവണ്ണനാ

൧൦൩൮. നിമന്തിതാ വാ പവാരിതാ വാതി ഏത്ഥ പോരാണഗണ്ഠിപദേ താവ ഏവം വുത്തം ‘‘പവാരിതാപി യാഗും പാതും ലഭതി, ഭോജ്ജയാഗും ന ലഭതി. യാഗു പനേത്ഥ ഖാദനീയഭോജനീയസങ്ഖ്യം ന ഗച്ഛതി. നിമന്തിതാ ഭിക്ഖുനീ പിണ്ഡായ ചരിത്വാ ഭുഞ്ജിതുകാമാ സാമികേ അപലോകേത്വാവ ഭുഞ്ജിതും ലഭതി. പരമ്പരഭോജനാപത്തി ഭിക്ഖുനീനം നത്ഥി. നിമന്തിതാ തം ഭത്തം ഭുഞ്ജിത്വാ വാ അഭുഞ്ജിത്വാ വാ പവാരിതാ കപ്പിയം കാരാപേത്വാ ഭുഞ്ജിതും ന ലഭതി, അകപ്പിയനിമന്തനേന നിമന്തിയമാനാ ദ്വേ നിമന്തനാനി സമ്പടിച്ഛിതുഞ്ച ന ലഭതീ’’തി. തത്ഥ ‘‘പവാരിതാപി യാഗും പാതും ലഭതീ’’തി വുത്തം പാളിയം, അട്ഠകഥായഞ്ച അനുഞ്ഞാതത്താ. ‘‘നിമന്തിതാ അപ്പവാരിതാ യാഗും പിവതീ’’തി ഹി പാളിയം വുത്തം. തത്രിദം സിക്ഖാപദവണ്ണനാപുബ്ബങ്ഗമസന്നിട്ഠാനം – നിമന്തിതാ വാ പവാരിതാ വാതി ഏത്ഥ വാസദ്ദേന അകപ്പിയനിമന്തനേന നിമന്തിതാ അപ്പവാരിതാ ഠപേത്വാ യാഗും അഞ്ഞം ഖാദനീയം വാ ഭോജനീയം വാ ഖാദേയ്യ വാ ഭുഞ്ജേയ്യ വാ, പാചിത്തിയം അഞ്ഞത്ര സാമികാനം അപലോകനാ. പരമ്പരഭോജനാഭാവേന ഭിക്ഖുനീനം കോ ഗുണോ ജാതോതി? ന ഏതാസം ഗുണലാഭോ, കേവലം പാകടതരം ജാതം. ഭിക്ഖൂപി വികപ്പേത്വാ മിസ്സേത്വാവ ഭുഞ്ജിതും ലഭന്തി. സമയേ യഥാസുഖം ലഭന്തി. ഇമിനാ അപലോകനേന കിന്തി? പവാരിതാ വാ അനിമന്തിതാ വാ ന കിഞ്ചി കപ്പിയം കാരാപേത്വാ ഗിലാനാതിരിത്തമ്പി ലഭന്തി, നിമന്തിതാ ച പവാരിതാ ച യാഗുമ്പി ന ലഭന്തി, അപലോകേത്വാപി ന ലഭന്തീതി.

ചതുത്ഥസിക്ഖാപദവണ്ണനാ നിട്ഠിതാ.

ആരാമവഗ്ഗവണ്ണനാ നിട്ഠിതാ.