ഉപാലിപഞ്ചകവണ്ണനാ

അനിസ്സിതവഗ്ഗവണ്ണനാ

൪൧൯. കായികഉപഘാതികാ നാമ കായേന വീതിക്കമോ.

നപ്പടിപ്പസ്സമ്ഭനവഗ്ഗവണ്ണനാ

൪൨൦. ഓമദ്ദകാരകോതി ഓമദ്ദിത്വാ അഭിഭവിത്വാ കാരകോ.

വോഹാരവഗ്ഗവണ്ണനാ

൪൨൪. ഭേദകരവത്ഥൂനി നിസ്സായ വിവാദാധികരണം സമുട്ഠാതി, ഏവം യഥാസങ്ഖ്യം ഗച്ഛതി. കോധോപനാഹാദിദ്വാദസമൂലപയോഗം വിവാദാധികരണം, തഥാ സേസേസു. ഓസാരണാദീസു നവസു ഠാനേസു കമ്മഞത്തിയാ കരണം. ദ്വീസു ഠാനേസു ഞത്തിദുതിയഞത്തിചതുത്ഥകമ്മേസു. യസ്മാ മഹാഅട്ഠകഥായം വുത്തനയേനേവ ഉഭതോവിഭങ്ഗാ അസങ്ഗഹിതാ, തസ്മാ യം കുരുന്ദിയം വുത്തം, തം ഗഹേതബ്ബന്തി സമ്ബന്ധോ.

ദിട്ഠാവികമ്മവഗ്ഗവണ്ണനാ

൪൨൫. തിണ്ണന്നം ഉപരി സഹ ആപത്തിം ദേസേതും ന ലബ്ഭന്തി. കമ്മനാനാസംവാസകാനം ലദ്ധിഗ്ഗഹിതകോവ ലദ്ധിനാനാസംവാസകോ. ‘‘അവിപ്പവാസസീമായ ഠിതസ്സാ’’തി മഹാസീമം കിര സന്ധായ വുത്തം.

൪൩൩. ‘‘ഉമ്മാദാ ചിത്തക്ഖേപാ’’തി പാഠോ.

മുസാവാദവഗ്ഗവണ്ണനാ

൪൪൪. പരിയായേന ജാനന്തസ്സാതി യസ്സ കസ്സചി ജാനന്തസ്സ പരിയായേന വുത്തമുസാവാദോതി അത്ഥോ.

൪൪൬. അനുയോഗോ ന ദാതബ്ബോതി തേന വുത്തം അനാദിയിത്വാ തുണ്ഹീ ഭവിതബ്ബന്തി അത്ഥോ.

ഭിക്ഖുനോവാദവഗ്ഗവണ്ണനാ

൪൫൪. വോഹാരനിരുത്തിയം സദ്ദനിരുത്തിയം. മഗ്ഗപച്ചവേക്ഖണാദയോ ഏകൂനവീസതി.

ഉബ്ബാഹികവഗ്ഗവണ്ണനാ

൪൫൫. പസാരേതാ മോഹേതാ.

അധികരണവൂപസമവഗ്ഗവണ്ണനാ

൪൫൮. ‘‘യഥാരത്തന്തി അനുപസമ്പന്നേ അപേക്ഖതീ’’തിപി വദന്തി. ‘‘യഥാവുഡ്ഢന്തി ഉപസമ്പന്നേ അപേക്ഖതീ’’തി ലിഖിതം.

കഥിനത്ഥാരവഗ്ഗവണ്ണനാ

൪൬൭. ‘‘ഏകാവത്തോ’’തിപി പഠന്തി, തസ്സ കുദ്ധോ കോധാഭിഭൂതോതി കിരത്ഥോ. ഏകവത്ഥോതിപി കേചി, ഉത്തരാസങ്ഗം അപനേത്വാ ഠിതോതി കിരത്ഥോ, തം സബ്ബം അട്ഠകഥായം ഉദ്ധടപാളിയാ വിരുജ്ഝതീതി. ഏകാവട്ടോതി ഹി ഉദ്ധടം, തസ്മാ ന ഗഹേതബ്ബം. അന്തരാ വുത്തകാരണേനാതി ‘‘കിച്ചയപസുതത്താ വന്ദനം അസമന്നാഹരന്തോ നലാടം പടിഹഞ്ഞേയ്യാ’’തിആദിവുത്തകാരണേന.

ഉപാലിപഞ്ചകവണ്ണനാ നിട്ഠിതാ.

ആപത്തിസമുട്ഠാനവണ്ണനാ

൪൭൦. പുബ്ബേ വുത്തമേവാതി സഹസേയ്യാദിപണ്ണത്തിവജ്ജം. ഇതരന്തി സചിത്തകം. ദേസേന്തോ, ദോമനസ്സികോ അഞ്ഞേഹി ഭിംസാപനാദീനി കത്വാ ആപത്തിം ആപജ്ജിത്വാതി അധിപ്പായോ.