൮. നിരോധവഗ്ഗോ

൧-൧൦. അസുഭസുത്താദിവണ്ണനാ

൨൪൮-൨൫൭. അനഭിരതിന്തി അനഭിരമണം അനപേക്ഖിതം. അച്ചന്തനിരോധഭൂതേ നിബ്ബാനേ പവത്തസഞ്ഞാ നിരോധസഞ്ഞാ. തത്ഥ സാ മഗ്ഗസഹഗതാ ലോകുത്തരാ, യാ പന നിബ്ബാനേ നിന്നഭാവേന പവത്താ, ഉപസമാനുസ്സതിസഹഗതാ ച, സാ ലോകിയാതി ആഹ – ‘‘നിരോധസഞ്ഞാ മിസ്സകാ’’തി. ‘‘തേസം നവസൂ’’തിആദി പമാദപാഠോ. ‘‘ഏകാദസസു അപ്പനാ ഹോതി, നവ ഉപചാരജ്ഝാനികാ’’തി പാഠോ ഗഹേതബ്ബോ. വീസതി കമ്മട്ഠാനാനീതി ഇദമ്പി ഇധാഗതനയോ, ന വിസുദ്ധിമഗ്ഗാദീസു ആഗതനയോ. ഏത്ഥ ച ആരമ്മണാദീസു യഥായോഗം അപ്പനം ഉപചാരം വാ പാപുണിത്വാ അരഹത്തപ്പത്തസ്സ പുബ്ബഭാഗഭൂതാ വിപസ്സനാമഗ്ഗബോജ്ഝങ്ഗാ കഥിതാ.

നിരോധവഗ്ഗവണ്ണനാ നിട്ഠിതാ.

ബോജ്ഝങ്ഗസംയുത്തവണ്ണനാ നിട്ഠിതാ.