൫. സങ്ഗാരവസുത്തവണ്ണനാ

൨൩൬. പഠമഞ്ഞേവാതി പുരേതരംയേവ. അസജ്ഝായകതാനം മന്താനം അപ്പടിഭാനം പഗേവ പഠമംയേവ സിദ്ധം, തത്ഥ വത്തബ്ബമേവ നത്ഥീതി അധിപ്പായോ. പരിയുട്ഠാനം നാമ അഭിഭവോ ഗഹണന്തി ആഹ – ‘‘കാമരാഗപരിയുട്ഠിതേനാതി കാമരാഗഗഹിതേനാ’’തി. വിക്ഖമ്ഭേതി അപനേതീതി വിക്ഖമ്ഭനം, പടിപക്ഖതോ നിസ്സരതി ഏതേനാതി നിസ്സരണം, വിക്ഖമ്ഭനഞ്ച തം നിസ്സരണഞ്ചാതി വിക്ഖമ്ഭനനിസ്സരണം. തേനാഹ – ‘‘തത്ഥാ’’തിആദി. സേസപദദ്വയേപി ഏസേവ നയോ. അത്തനാ അരണിയോ പത്തബ്ബോ അത്തത്ഥോ, തഥാ പരത്ഥോ വേദിതബ്ബോ.

‘‘അനിച്ചതോ അനുപസ്സന്തോ നിച്ചസഞ്ഞം പജഹതീ’’തിആദീസു ബ്യാപാദാദീനം അനാഗതത്താ അബ്യാപാദവാരേ തദങ്ഗനിസ്സരണം ന ഗഹിതം. കിഞ്ചാപി ന ഗഹിതം, പടിസങ്ഖാനവസേന പന തസ്സ വിനോദേതബ്ബതായ തദങ്ഗനിസ്സരണമ്പി ലബ്ഭതേവാതി സക്കാ വിഞ്ഞാതും. ആലോകസഞ്ഞാ ഉപചാരപ്പത്താ, അപ്പനാപ്പത്താ വാ, യോ കോചി കസിണജ്ഝാനാദിഭേദോ സമഥോ. ധമ്മവവത്ഥാനം ഉപചാരപ്പനാപ്പത്തവസേന ഗഹേതബ്ബം.

കുഥിതോതി തത്തോ. ഉസ്മുദകജാതോതി തസ്സേവ കുഥിതഭാവസ്സ ഉസ്മുദകതം അച്ചുണ്ഹതം പത്തോ. തേനാഹ ‘‘ഉസുമജാതോ’’തി. തിലബീജകാദിഭേദേനാതി തിലബീജകകണ്ണികകേസരാദിഭേദേന. സേവാലേന…പേ… പണകേനാതി ഉദകപിച്ഛിലേന. അപ്പസന്നോ ആകുലതായ. അസന്നിസിന്നോ കലലുപ്പത്തിയാ. അനാലോകട്ഠാനേതി ആലോകരഹിതേ ഠാനേ.

സങ്ഗാരവസുത്തവണ്ണനാ നിട്ഠിതാ.