൮. ബീജഗാമസുത്തവണ്ണനാ

൧൧൪൮. ‘‘മൂലബീജ’’ന്തിആദീസു മൂലമേവ ബീജന്തി മൂലബീജം, മൂലബീജം ഏതസ്സാതിപി മൂലബീജം. തത്ഥ പുരിമേന ബീജഗാമോ വുത്തോ ‘‘ബീജാനം സമൂഹോ’’തി കത്വാ, ദുതിയേന ഭൂതഗാമോ. ദുവിധോപേസോ സാമഞ്ഞനിദ്ദേസേന, ‘‘മൂലബീജഞ്ച മൂലബീജഞ്ച മൂലബീജ’’ന്തി ഏകസേസനയേന വാ ബീജത്ഥോ വേദിതബ്ബോ. ഏസ നയോ സേസേസുപി. ഫളുബീജന്തി പബ്ബബീജം. ബാഹിരപച്ചയന്തരസമവായേ സദിസഫലുപ്പത്തിയാ വിസേസകാരണഭാവതോ വിരുഹനസമത്ഥേ സാരഫലേ നിരുള്ഹോ ബീജ-സദ്ദോ. തദത്ഥസിദ്ധിയാ മൂലാദീസുപി കേസുചി പവത്തതീതി തതോ നിവത്തനത്ഥം ഏകേന ബീജ-സദ്ദേന വിസേസേത്വാ വുത്തം ‘‘ബീജബീജ’’ന്തി ‘‘രൂപരൂപം, ദുക്ഖദുക്ഖ’’ന്തി (സം. നി. ൪.൩൨൭) ച യഥാ. നീലതിണരുക്ഖാദികസ്സാതി അല്ലതിണസ്സ ചേവ അല്ലരുക്ഖാദികസ്സ ച. ആദി-സദ്ദേന ഓസധിഗച്ഛലതാദീനം ഗഹണം.