൯. അസങ്ഖതസംയുത്തം

൧. പഠമവഗ്ഗോ

൧-൧൧. കായഗതാസതിസുത്താദിവണ്ണനാ

൩൬൬-൩൭൬. അസങ്ഖതന്തി ന സങ്ഖതം ഹേതുപച്ചയേതി. തേനാഹ ‘‘അകത’’ന്തി. ഹിതം ഏസന്തേനാതി മേത്തായന്തേന. അനുകമ്പമാനേനാതി കരുണായന്തേന. ഉപാദായാതി ആദിയിത്വാതി അയമത്ഥോതിആഹ ‘‘ചിത്തേന പരിഗ്ഗഹേത്വാ’’തി. അവിപരീതധമ്മദേസനാതി അവിപരീതധമ്മസ്സ ദേസനാ, പടിപത്തിമ്പി സാവകാ വിയ ഗരുകോ ഭഗവാ. ദായജ്ജം അത്തനോ അധിട്ഠിതം നിയ്യാതേതി.

ഭിക്ഖാസമ്പത്തികാലാദീനം സത്തന്നം സപ്പായാനം സമ്പത്തിയാ ലബ്ഭനകാലേ. വിപത്തികാലേ പന ഏത്ഥ വുത്തവിപരിയായേന അത്ഥോ വേദിതബ്ബോ. ഭാരിയന്തി ദുക്ഖബഹുലതായ ദാരുണം. അമ്ഹാകം സന്തികാ ലദ്ധബ്ബാ. തുമ്ഹാകം അനുസാസനീതി തുമ്ഹാകം ദാതബ്ബാ അനുസാസനീ.

കായഗതാസതിസുത്താദിവണ്ണനാ നിട്ഠിതാ.

൨. ദുതിയവഗ്ഗോ

൨൩-൩൩. അസങ്ഖതസുത്താദിവണ്ണനാ

൩൭൭-൪൦൯. തത്ഥ ച നത്ഥി ഏത്ഥ തണ്ഹാസങ്ഖാതം നതം, നത്ഥി ഏതസ്മിം വാ അധിഗതേ പുഗ്ഗലഭാവോതി അനതം. അനാസവന്തി ഏത്ഥാപി ഏസേവ നയോ. സച്ചധമ്മതായ സച്ചം. വട്ടദുക്ഖതോ പാരമേതീതി പാരം. സണ്ഹട്ഠേനാതി സുഖുമട്ഠേന നിപുണം. തതോ ഏവ ദുദ്ദസതായ. അജജ്ജരം നിച്ചസഭാവത്താ. നത്ഥി ഏതസ്സ നിദസ്സനന്തി വാ അനിദസ്സനം. ഏതസ്മിം അധിഗതേ നത്ഥി സംസാരേ. പപഞ്ചന്തി വാ നിപ്പപഞ്ചം.

ഏതസ്മിം അധിഗതേ പുഗ്ഗലസ്സ മരണം നത്ഥീതി വാ അമതം. അതപ്പകട്ഠേന വാ പണീതം. സുഖഹേതുതായ വാ സിവം. തണ്ഹാ ഖീയന്തി ഏത്ഥാതി തണ്ഹക്ഖയം.

അഞ്ഞസ്സ താദിസസ്സ അഭാവതോ വിമ്ഹാപനീയതായ അഭൂതമേവാതി. കുതോചി പച്ചയതോ അനിബ്ബത്തമേവ ഹുത്വാ ഭൂതം വിജ്ജമാനം. തേനാഹ ‘‘അജാതം ഹുത്വാ അത്ഥീ’’തി. നത്ഥി ഏത്ഥ ദുക്ഖന്തി നിദ്ദുക്ഖം, തസ്സ ഭാവോ നിദ്ദുക്ഖത്തം. തസ്മാ അനീതികം ഈതിരഹിതം. വാനം വുച്ചതി തണ്ഹാ, തദഭാവേന നിബ്ബാനം. ബ്യാബജ്ഝം വുച്ചതി ദുക്ഖം, തദഭാവേന അബ്യാബജ്ഝം. പരമത്ഥതോ സച്ചതോ സുദ്ധിഭാവേന. കാമാ ഏവ പുഥുജ്ജനേഹി അല്ലീയിതബ്ബതോ ആലയാ. ഏസ നയോ സേസേസുപി. പതിട്ഠട്ഠേനാതി പതിട്ഠാഭാവേന വട്ടദുക്ഖതോ മുച്ചിതുകാമാനം ദീപസദിസം ഓഘേഹി അനജ്ഝോത്ഥരണീയത്താ. അല്ലീയിതബ്ബയുത്തട്ഠേനാതി അല്ലീയിതും അരഹഭാവതോ. തായനട്ഠേനാതി സപരതായനട്ഠേന. ഭയസരണട്ഠേനാതി ഭയസ്സ ഹിംസനട്ഠേന. സേട്ഠം ഉത്തമം. ഗതീതി ഗന്ധബ്ബട്ഠാനം.

അസങ്ഖതസുത്താദിവണ്ണനാ നിട്ഠിതാ.

അസങ്ഖതസംയുത്തവണ്ണനാ നിട്ഠിതാ.