൯. കുലസുത്തവണ്ണനാ

൩൬൧. ഏവം പവത്തഈഹിതികാതി ഏവം ദ്വിധാ പവത്തഈഹിതികാ. ദ്വീഹിതികാ ദുക്കരജീവികപയോഗാ. സലാകമത്തം വുത്തം ഏത്ഥാതി സലാകാ വുത്താ, പുരിമപദേ ഉത്തരപദലോപോ. ഉഭതോകോടികന്തി യദി ‘‘കുലാനുദയം ന വണ്ണേമീ’’തി വദതി, ‘‘ഭൂതാ നിക്കരുണാ സമണ തുമ്ഹേ’’തി വാദം ആരോപേഹി. അഥ സബ്ബദാപി ‘‘കുലാനുദയം വണ്ണേമീ’’തി വദതി. ഏവം സന്തേ ‘‘കസ്മാ ഏവം ദുബ്ഭിക്ഖേ കാലേ മഹതിയാ പരിസായ പരിവുതോ ജനപദചാരികം ചരന്താ കുലൂപച്ഛേദായ പടിപജ്ജഥാ’’തി ഏവം ഉഭതോകോടികം വാദം ആരോപേഹീതി ഗാമണിം ഉയ്യോജേസി.

ദ്വേ അന്തേതി ഉഭോ കോടിയോ. ബഹി നീഹരിതുന്തി ന വണ്ണേമി വണ്ണേമീതി ദ്വേ അന്തേ മോചേന്തോ തം പുച്ഛിതമത്ഥം ബഹി നീഹരതി നാമ. തത്ഥ ദോസം ദത്വാ ചോദേന്തോ തം അപുച്ഛം കരോന്തോ ഗിലിത്വാ വിയ അന്തോ പവേസേതി നാമ.

ഇതോ സോ ഗാമണീതിആദി അത്തനോ ഭിക്ഖൂനം അഞ്ഞേസഞ്ച അത്ഥകാമാനം ഭിക്ഖപ്പദാനേന അനിട്ഠപ്പത്തിഅഭാവദസ്സനത്ഥം ആരദ്ധം. ദാനേന സമ്ഭൂതാനീതി ദാനമയേന പുഞ്ഞകിരിയവത്ഥുനാ സമ്മദേവ ഭൂതിം വഡ്ഢിം പത്താനി. സച്ചേന അരിയവോഹാരേന സമ്മദേവ ഭൂതാനി ഉപ്പന്നാനി സച്ചസമ്ഭൂതാനീതി ആഹ ‘‘സച്ചം നാമ സച്ചവാദിതാ’’തി. സേസസീലന്തി അട്ഠവിധഅരിയവോഹാരതോ അഞ്ഞസീലം. നിഹിതന്തി തസ്മിം കുലേ പുബ്ബപുരിസേഹി നിധാനഭാവേന നിഹിതം. ദുപ്പയുത്താതി കസിവാണിജ്ജാദിവസേന ദുട്ഠു പയുത്താ കമ്മന്താ. വിപജ്ജന്തീതി നസ്സന്തി. കുലങ്ഗാരോതി കുലസ്സ അങ്ഗാരസദിസോ വിനാസകപുഗ്ഗലോ. അനിച്ചതാതി മരണം. തസ്മിം കുലേ പധാനപുരിസാനം ഭോഗാനം വാ സബ്ബസോ വിനാസോ. തേനാഹ ‘‘ഹുത്വാ അഭാവോ’’തിആദി.

കുലസുത്തവണ്ണനാ നിട്ഠിതാ.