൩-൫. യോധാജീവസുത്താദിവണ്ണനാ

൩൫൫-൩൫൭. യുജ്ഝനം യോധോ, സോ ആജീവോ ഏതസ്സാതി യോധാജീവോ. തേനാഹ – ‘‘യുദ്ധേന ജീവികം കപ്പനകോ’’തി, ഉസ്സാഹം വായാമം കരോതീതി യുജ്ഝനവസേന ഉസ്സാഹം വായാമം കരോതി. പരിയാപാദേന്തീതി മരണപരിയന്തികം ആപദം പാപേന്തി. തേനാഹ ‘‘മരണം പടിപജ്ജാപേന്തീ’’തി. ദുട്ഠു ഠപിതന്തി ദുട്ഠാകാരേന അത്തനോ പരേസഞ്ച അത്ഥാവഹഭാവം ന ഗതം പടിപന്നം. പരേഹി സങ്ഗാമേ ജിതാ ഹതാ ഏത്ഥ ജായന്തീതി പരജിതോ നാമ നിരയോ. അസിധനുഗദായസങ്കുചക്കാനി പഞ്ചാവുധാനി. തം സന്ധായാതി തം യോധാജീവം പുഗ്ഗലം സന്ധായ. ഏതം ‘‘യോ സോ’’തിആദി വുത്തം. ചതുത്ഥപഞ്ചമേസൂതി ഹത്ഥാരോഹഅസ്സാരോഹസുത്തേസു. ഏസേവ നയോതി ഏസോ തതിയേ വുത്തോ ഏവ അത്ഥതോ വിസേസാഭാവതോ.

യോധാജീവസുത്താദിവണ്ണനാ നിട്ഠിതാ.