൪. മഹകപാടിഹാരിയസുത്തവണ്ണനാ

൩൪൬. തേസം അനുജാനന്തോതി തേസം ദാസകമ്മകരാനം സേസകേ യഥാരുചി വിചാരണം അനുജാനന്തോ. കുധിതന്തി ബലവതാ സൂരിയസന്താപേന സങ്കുഥിതം. തേനാഹ ‘‘ഹേട്ഠാ’’തിആദി. അതിതിഖിണന്തി അതിവിയ തിക്ഖധാതുകം. അസമ്ഭിന്നപദന്തി അഞ്ഞത്ഥ അനാഗതത്താ തിപിടകേ അവോമിസ്സകപദം, ഇധേവ ആഗതപദന്തി അത്ഥോ. പടിലീയമാനേനാതി പടികംസേന വിസേസനേന വിലീയമാനേന കായേന.

ഏത്ഥ ചാതി ഏതസ്മിം അധിട്ഠാനിദ്ധികരണേ. അബ്ഭമണ്ഡപം കത്വാതി സമന്തതോ ഛാദനവസേന മണ്ഡപം വിയ മേഘപടലം ഉപ്പാദേത്വാ. ദേവോതി മേഘോ. ഏകമേകം ഫുസിതകം ഫുസായതു ജാലവിനദ്ധം വിയ വസ്സതു. ഏവം വുത്തപ്പകാരേന നാനാപരികമ്മം നാനാധിട്ഠാനം ഏകതോ പരികമ്മം ഏകതോ അധിട്ഠാനന്തി ചതുക്കമേത്ഥ സമ്ഭവതീതി ദസ്സേതി ‘‘ഏത്ഥ ചാ’’തിആദിനാ. യഥാ തഥാതി യഥാവുത്തേസു ചതൂസു പകാരേസു യേന വാ തേന വാ പകാരേന കരോന്തസ്സ. കതപരികമ്മസ്സാതി ‘‘ഏവം വാ ഏവം വാ ഹോതൂ’’തി പവത്തിതപരികമ്മചിത്തസ്സ. ‘‘പരികമ്മാനന്തരേനാതി അധിട്ഠാനചിത്തുപ്പാദനത്ഥം സമാപന്നപാദകജ്ഝാനതോ വുട്ഠായ അധിട്ഠാനചിത്തസ്സ ഏകാവജ്ജനവീഥിയം പവത്തപരികമ്മം സന്ധായ വുത്ത’’ന്തി വദന്തി.

മഹകപാടിഹാരിയസുത്തവണ്ണനാ നിട്ഠിതാ.