൯. അനിമിത്തപഞ്ഹസുത്തവണ്ണനാ

൩൪൦. വിപസ്സനാസമാധിംയേവ, ന ഫലസമാധിം. ഛേജ്ജകിച്ചം ന നിപ്ഫജ്ജതി അവിച്ഛേദവസേന അപ്പവത്തനതോ. നികന്തീതി വിപസ്സനം അസ്സാദേന്തീ പവത്തതണ്ഹാ. സാധേതും നാസക്ഖി ഉപക്കിലിട്ഠത്താ. നിമിത്താനുസാരീതി നിച്ചസുഖഅത്തനിമിത്താനം അപൂരണതോ രാഗദോസമോഹനിമിത്താനിപേത്ഥ നിമിത്താനേവ. വുട്ഠാന…പേ… സമാധിന്തി ഏതേന യാവ മഗ്ഗോ നാധിഗതോ, താവ വുട്ഠാനഗാമിനിവിപസ്സനമനുയുഞ്ജന്തോപി യഥാരഹം അനിമിത്തം അപ്പണിഹിതം സുഞ്ഞതം ചേതോസമാധിം അനുയുത്തോ വിഹരതീതി വത്തബ്ബതം അരഹതീതി ദസ്സേതി. വിപസ്സനാസമ്പയുത്തന്തി വിപസ്സനാസങ്ഖാതഞാണസമ്പയുത്തം. ചേതോസമാധിന്തി ചിത്തസീസേന വിപസ്സനാസമാധിമാഹ. ഉപരിമഗ്ഗഫലസമാധിന്തി പഠമമഗ്ഗസമാധിസ്സ പഗേവ അധിഗതത്താ.

അനിമിത്തപഞ്ഹസുത്തവണ്ണനാ നിട്ഠിതാ.