൬. മോഗ്ഗല്ലാനസംയുത്തം

൧-൮. പഠമജ്ഝാനപഞ്ഹസുത്താദിവണ്ണനാ

൩൩൨-൩൩൯. കാമസഹഗതേസു സഞ്ഞാമനസികാരേസു ഉപട്ഠഹന്തേസു ബ്യാപാദാദിസഹഗതാപി സഞ്ഞാമനസികാരാ യഥാപച്ചയം ഉപട്ഠഹന്തിയേവാതി വുത്തം ‘‘കാമസഹഗതാതി പഞ്ചനീവരണസഹഗതാ’’തി. നീവരണാനഞ്ഹേത്ഥ നിദസ്സനമത്തമേതം, യദിദം കാമഗ്ഗഹണം. പഹീനാവസേസാ ചേത്ഥ നീവരണാ വേദിതബ്ബാ, തസ്മാ പഞ്ചഗ്ഗഹണം ന കത്തബ്ബം. തസ്സാതി മഹാമോഗ്ഗല്ലാനത്ഥേരസ്സ സന്തതോ ഉപട്ഠഹിംസു അചിണ്ണവസിതായ. തേനാഹ ‘‘ഹാനഭാഗിയം നാമ അഹോസീ’’തി. ആരമ്മണ…പേ… സഹഗതന്തി വുത്തം ഇതരേസം അഭാവതോ.

പഠമജ്ഝാനപഞ്ഹസുത്താദിവണ്ണനാ നിട്ഠിതാ.

൯. അനിമിത്തപഞ്ഹസുത്തവണ്ണനാ

൩൪൦. വിപസ്സനാസമാധിംയേവ, ന ഫലസമാധിം. ഛേജ്ജകിച്ചം ന നിപ്ഫജ്ജതി അവിച്ഛേദവസേന അപ്പവത്തനതോ. നികന്തീതി വിപസ്സനം അസ്സാദേന്തീ പവത്തതണ്ഹാ. സാധേതും നാസക്ഖി ഉപക്കിലിട്ഠത്താ. നിമിത്താനുസാരീതി നിച്ചസുഖഅത്തനിമിത്താനം അപൂരണതോ രാഗദോസമോഹനിമിത്താനിപേത്ഥ നിമിത്താനേവ. വുട്ഠാന…പേ… സമാധിന്തി ഏതേന യാവ മഗ്ഗോ നാധിഗതോ, താവ വുട്ഠാനഗാമിനിവിപസ്സനമനുയുഞ്ജന്തോപി യഥാരഹം അനിമിത്തം അപ്പണിഹിതം സുഞ്ഞതം ചേതോസമാധിം അനുയുത്തോ വിഹരതീതി വത്തബ്ബതം അരഹതീതി ദസ്സേതി. വിപസ്സനാസമ്പയുത്തന്തി വിപസ്സനാസങ്ഖാതഞാണസമ്പയുത്തം. ചേതോസമാധിന്തി ചിത്തസീസേന വിപസ്സനാസമാധിമാഹ. ഉപരിമഗ്ഗഫലസമാധിന്തി പഠമമഗ്ഗസമാധിസ്സ പഗേവ അധിഗതത്താ.

അനിമിത്തപഞ്ഹസുത്തവണ്ണനാ നിട്ഠിതാ.

൧൦-൧൧. സക്കസുത്താദിവണ്ണനാ

൩൪൧-൩൪൨. അവേച്ചപ്പസാദേനാതി വത്ഥുത്തയം യാഥാവതോ ഞത്വാ ഉപ്പന്നപസാദേന, മഗ്ഗേനാഗതപസാദേനാതി അത്ഥോ. സോ പന കേനചി അസംഹാരിയോ അസമ്പവേധീതി ആഹ ‘‘അചലപ്പസാദേനാ’’തി. അഭിഭവന്തി അത്തനോ പുഞ്ഞാനുഭാവേന.

സക്കസുത്താദിവണ്ണനാ നിട്ഠിതാ.

മോഗ്ഗല്ലാനസംയുത്തവണ്ണനാ നിട്ഠിതാ.