൮. ഗിലാനവഗ്ഗോ

൧-൫. പഠമഗിലാനസുത്താദിവണ്ണനാ

൭൪-൭൮. അപ്പഞ്ഞാതോതി നാമഗോത്തതോ ചേവ സീലാദിഗുണേഹി ച അപ്പഞ്ഞാതോ അവിസ്സുതോ. ഥേരമജ്ഝിമഭാവം അപ്പത്തതായ നവോ.

പഠമഗിലാനസുത്താദിവണ്ണനാ നിട്ഠിതാ.

൭. ദുതിയഅവിജ്ജാപഹാനസുത്തവണ്ണനാ

൮൦. അനിച്ചാദിവസേന അഭിനിവിസനം അഭിനിവേസോ, സോ ഏവ ധമ്മസഭാവം അതിക്കമിത്വാ പരതോ ആമസനതോ പരാമാസോ, സോ ഏവ ഗാഹോ. തേന അഭിനിവേസപരാമാസഗ്ഗാഹേന ഗണ്ഹിതും ന യുത്താ അനിച്ചാദിസഭാവത്താ. സങ്ഖാരാ ഏവ പവത്തിയാ കാരണഭാവതോ സങ്ഖാരനിമിത്താനി. യോ സങ്ഖാരേസു അപരിഞ്ഞാതാഭിനിവേസേന പസ്സിതബ്ബോ അത്താകാരോ, സോ ന ഹോതീതി അഞ്ഞോ അനത്താകാരോ, തതോ അഞ്ഞതോ പസ്സതി. പരിഞ്ഞാതാഭിനിവേസോതി തീരണപരിഞ്ഞായ പരിച്ഛിജ്ജ ഞാതമിച്ഛാഭിനിവേസോ. പരിഞ്ഞാതാഭിനിവേസോതി വാ പരിഞ്ഞാതവിപസ്സനാഭിനിവേസോ. വിപസ്സനാതി അരൂപസത്തകവസേന വിപസ്സനായ പരിജാനിതബ്ബാ.

ദുതിയഅവിജ്ജാപഹാനസുത്തവണ്ണനാ നിട്ഠിതാ.

൮. സമ്ബഹുലഭിക്ഖുസുത്തവണ്ണനാ

൮൧. കേവലന്തി ഇതരലക്ഖണേഹി അവോമിസ്സം.

൧൦. ഫഗ്ഗുനപഞ്ഹാസുത്തവണ്ണനാ

൮൩. തണ്ഹായ പഹീനായ ദിട്ഠിമാനാപി പഹീനാ ഏവാതി ‘‘തണ്ഹാപപഞ്ചസ്സ ഛിന്നത്താ ഛിന്നപപഞ്ചേ’’തി വുത്തം. ദുതിയപദേപി ഏസേവ നയോ. ഇധ സത്തവോഹാരോ ചക്ഖാദീസു വിജ്ജമാനേസു ഏവ ഹോതി, തസ്മാ പരിനിബ്ബുതാനഞ്ച വോഹാരോ ചക്ഖാദീസു സന്നിസ്സയേനേവ, നാഞ്ഞഥാതി അതിക്കന്തബുദ്ധേഹി പരിഹരിതാനി ചക്ഖുസോതാദീനി പുച്ഛാമീതി പുച്ഛതി ‘‘അത്ഥി നു ഖോ ഭന്തേ’’തിആദിനാ. ചക്ഖുസോതാദിവട്ടം വട്ടേ പവത്തേയ്യ.

ഫഗ്ഗുനപഞ്ഹാസുത്തവണ്ണനാ നിട്ഠിതാ.

ഗിലാനവഗ്ഗവണ്ണനാ നിട്ഠിതാ.