൨. യമകവഗ്ഗോ

൧-൪. പഠമപുബ്ബേസമ്ബോധസുത്താദിവണ്ണനാ

൧൩-൧൬. ദ്വീസുപി സുത്തേസു ആയതനാനം വസേന ദേസനാ ഏകരസാവാതി ‘‘പഠമദുതിയേസൂ’’തി ഏകജ്ഝം പദുദ്ധാരോ കതോ. ആഹിതോ അഹംമാനോ ഏത്ഥാതി അത്താ, അത്തഭാവോ. അത്താനമധി അജ്ഝത്തം, തപ്പരിയാപന്നത്താ തത്ഥ ഭവാനി അജ്ഝത്തികാനി, തേസം അജ്ഝത്തികാനം. അജ്ഝത്തഞ്ച നാമ അജ്ഝത്തജ്ഝത്തം, നിയകജ്ഝത്തം, ഗോചരജ്ഝത്തം, വിസയജ്ഝത്തന്തി ചതുബ്ബിധം. തത്ഥ അജ്ഝത്തജ്ഝത്തം അജ്ഝത്തേ ഭവന്തി അജ്ഝത്തികന്തി ആഹ ‘‘അജ്ഝത്തജ്ഝത്തവസേന അജ്ഝത്തികാന’’ന്തി. തേസം ചക്ഖാദീനം അജ്ഝത്തേസുപി അജ്ഝത്തികഭാവോ അധികസിനേഹവത്ഥുതായാതി ആഹ ‘‘ഛന്ദരാഗസ്സ അധിമത്തബലവതായാ’’തി. ഇദാനി തത്ഥ തമത്ഥം പടിയോഗിനാ സദ്ധിം ഉദാഹരണവസേന ദസ്സേന്തോ ‘‘മനുസ്സാനം ഹീ’’തിആദിമാഹ. തം ഉത്താനമേവ. ബാഹിരാനീതി അജ്ഝത്തികതോ ബഹി ഭവാനി.

പഠമപുബ്ബേസമ്ബോധസുത്താദിവണ്ണനാ നിട്ഠിതാ.

൫-൬. പഠമനോചേഅസ്സാദസുത്താദിവണ്ണനാ

൧൭-൧൮. നിക്ഖന്താതി ലോകതോ നിക്ഖന്താ. വിസംയുത്താ സംയോഗഹേതൂനം കിലേസാനം പഹീനത്താ നോ സംയുത്താ. നോ അധിമുത്താതി ന ഉസ്സുക്കജാതാ. വിമരിയാദീ…പേ… ചേതസാതി വിഗതകിലേസവട്ടമരിയാദതായ നിമ്മരിയാദീകതേന ചിത്തേന. ചതുസച്ചമേവ കഥിതം ചക്ഖാദീനം അസ്സാദാദിനോ കഥിതത്താ.

പഠമനോചേഅസ്സാദസുത്താദിവണ്ണനാ നിട്ഠിതാ.

൭-൧൦. പഠമാഭിനന്ദസുത്താദിവണ്ണനാ

൧൯-൨൨. വട്ടവിവട്ടമേവ കഥിതം അഭിനന്ദനാനം ഉപ്പാദനിരോധാനഞ്ച വസേന ദേസനായ പവത്തത്താ. അനുപുബ്ബകഥാതി ആദിതോ പട്ഠായ പദത്ഥവണ്ണനാ. നേസന്തി സുത്താനം.

പഠമാഭിനന്ദസുത്താദിവണ്ണനാ നിട്ഠിതാ.

യമകവഗ്ഗവണ്ണനാ നിട്ഠിതാ.