൨. ഖണസുത്തവണ്ണനാ

൧൩൫. ഛഫസ്സായതനികാതി ഛഹി ഫസ്സായതനേഹി അനിട്ഠസംവേദനിയാ. ഛദ്വാരഫസ്സപടിവിഞ്ഞത്തീതി ഛഹിപി ദ്വാരേഹി ആരമ്മണസ്സ പടിസംവേദനാ ഹോതിയേവ സബ്ബസോ ദുക്ഖാനുഭവനത്ഥം. താവതിംസപുരന്തി സുദസ്സനമഹാനഗരം. അഭാവോ നാമ നത്ഥി സബ്ബഥാ സുഖാനുഭവനതോ. നിരയേതി ഇമിനാ ദുഗ്ഗതി ഭവസാമഞ്ഞേന ഇതരാപായാപി ഗഹിതാ ഏവ. മഗ്ഗബ്രഹ്മചരിയവാസം വസിതും ന സക്കാതി ഇമിനാ പന സബ്ബേസമ്പി അച്ഛിന്ദികട്ഠാനാനം ഗഹണം ദട്ഠബ്ബം. ഇമേവാതി ഇമസ്മിം മനുസ്സലോകേ ഏവ. അപായോപി പഞ്ഞായതി അപായദുക്ഖസദിസസ്സ ദുക്ഖസ്സ കദാചി പടിസംവേദനതോ. സഗ്ഗോപി പഞ്ഞായതി ദേവഭോഗസദിസസമ്പത്തിയാ കദാചി പടിലഭിതബ്ബതോ.

അയം കമ്മഭൂമീതി അയം മനുസ്സലോകോ പുരിസഥാമകരണായ കമ്മഭൂമി നാമ താസം യോഗ്യട്ഠാനഭാവതോ. തത്ഥ പധാനകമ്മം ദസ്സേന്തോ ‘‘ഇധ മഗ്ഗഭാവനാ’’തി ആഹ. ഠാനാനീതി കാരണാനി. സംവേജനിയാനീതി സംവേഗജനനാനി ബഹൂനി ജാതിആദീനി. തഥാ ഹി ജാതി, ജരാ, ബ്യാധി, മരണം, അപായഭവം, തത്ഥപി നിരയൂപപത്തിഹേതുകം, തിരച്ഛാനുപപത്തിഹേതുകം, അസൂരകായൂപപത്തിഹേതുകം, അതീതേ വട്ടമൂലകം, അനാഗതേ വട്ടമൂലകം, പച്ചുപ്പന്നേ ആഹാരപരിയേട്ഠിമൂലകന്തി ബഹൂനി സംവേഗവത്ഥൂനി പച്ചവേക്ഖിത്വാ സംവേഗജാതോ സഞ്ജാതസംവേഗോ യോനിസോ പധാനമനുയുഞ്ജസ്സു. സംവേഗാതി സംവേഗമാപജ്ജസ്സു.

ഖണസുത്തവണ്ണനാ നിട്ഠിതാ.