൧൧. യോഗക്ഖേമിവഗ്ഗോ

൧. യോഗക്ഖേമിസുത്തവണ്ണനാ

൧൦൪. ചതൂഹി യോഗേഹീതി കാമയോഗാദീഹി ചതൂഹി യോഗേഹി. ഖേമിനോതി ഖേമവതോ കുസലിനോ. കാരണഭൂതന്തി കത്തബ്ബഉപായസ്സ കാരണഭൂതം. പരിയായതി പവത്തിം നിവത്തിഞ്ച ഞാപേതീതി പരിയായോ, ധമ്മോ ച സോ പരിയത്തിധമ്മത്താ പരിയായോ ചാതി ധമ്മപരിയായോ, തം ധമ്മപരിയായം. യസ്മാ പന സോ തസ്സാധിഗമസ്സ കാരണം ഹോതി, തസ്മാ വുത്തം ‘‘ധമ്മകാരണ’’ന്തി. യുത്തിന്തി സമഥവിപസ്സനാധമ്മാനീതി വാ ചതുസച്ചധമ്മാനീതി വാ. ‘‘തസ്മാ’’തി പദം ഉദ്ധരിത്വാ – ‘‘കസ്മാ’’തി കാരണം പുച്ഛന്തോ ‘‘കിം അക്ഖാതത്താ, ഉദാഹു പഹീനത്താ’’തി വിഭജിത്വാ പുച്ഛി. യസ്മാ പന ഛന്ദരാഗപ്പഹാനം യോഗക്ഖേമിഭാവസ്സ കാരണം, ന കഥനം, തസ്മാ ‘‘പഹീനത്താ’’തിആദി വുത്തം.

യോഗക്ഖേമിസുത്തവണ്ണനാ നിട്ഠിതാ.

൨-൧൦. ഉപാദായസുത്താദിവണ്ണനാ

൧൦൫-൧൧൩. വേദനാസുഖദുക്ഖന്തി വേദനാസങ്ഖാതം സുഖഞ്ച ദുക്ഖഞ്ച കഥിതം. ‘‘അജ്ഝത്തം സുഖം ദുക്ഖ’’ന്തി വുത്തത്താ വിമുത്തിസുഖസ്സ ച സളായതനദുക്ഖസ്സ ച കഥിതത്താ വിവട്ടസുഖം ചേത്ഥ കഥിതമേവാതി സക്കാ വിഞ്ഞാതും. കാമം ഖന്ധിയവഗ്ഗേ ഖന്ധവസേന ദേസനാ ആഗതാ, ന ആയതനവസേന. ഏത്ഥ പന വത്തബ്ബം അത്ഥജാതം ഖന്ധിയവഗ്ഗേ വുത്തനയമേവാതി.

ഉപാദായസുത്താദിവണ്ണനാ നിട്ഠിതാ.

യോഗക്ഖേമിവഗ്ഗവണ്ണനാ നിട്ഠിതാ.