൭. അരഹന്തവഗ്ഗോ

൧. ഉപാദിയമാനസുത്തവണ്ണനാ

൬൩. ഗണ്ഹമാനോതി ‘‘ഏതം മമാ’’തിആദിനാ ഗണ്ഹമാനോ. പാസേനാതി രാഗപാസേന. തഞ്ഹി മാരോ മാരപാസോതി മഞ്ഞതി. തേനാഹ ‘‘അന്തലിക്ഖചരോ പാസോ, യ്വായം ചരതി മാനസോ’’തി (സം. നി. ൧.൧൫൧; മഹാവ. ൩൩). മുത്തോ നാമ ഹോതി അനുപാദിയതോ സബ്ബസോ ഖന്ധസ്സ അഭാവതോ.

ഉപാദിയമാനസുത്തവണ്ണനാ നിട്ഠിതാ.

൨-൬. മഞ്ഞമാനസുത്താദിവണ്ണനാ

൬൪-൬൮. ‘‘ഏതം മമാ’’തിആദിനാ. മഞ്ഞനാ അഭിനന്ദനാ ച. തണ്ഹാഛന്ദോതി തണ്ഹാ ഏവ ഛന്ദോ. സാ ഹി തണ്ഹായനട്ഠേന തണ്ഹാ, ഛന്ദികതട്ഠേന ഛന്ദോ. ചതുത്ഥം അനിച്ചലക്ഖണമുഖേന വുത്തം, പഞ്ചമം ദുക്ഖലക്ഖണമുഖേന, ഛട്ഠം അനത്തലക്ഖണമുഖേന. സേസം തീസുപി സദിസമേവാതി വുത്തം ‘‘ഏസേവ നയോ’’തി.

മഞ്ഞമാനസുത്താദിവണ്ണനാ നിട്ഠിതാ.

൭. അനത്തനിയസുത്തവണ്ണനാ

൬൯. അനത്തനിയന്തി ന അത്തനിയം. തേനാഹ ‘‘ന അത്തനോ സന്തക’’ന്തി.

അനത്തനിയസുത്തവണ്ണനാ നിട്ഠിതാ.

൮-൧൦. രജനീയസണ്ഠിതസുത്താദിവണ്ണനാ

൭൦-൭൨. രജനീയേനാതി രജനീയേന രാഗുപ്പാദകേന. തേനാഹ ‘‘രാഗസ്സ പച്ചയഭാവേനാ’’തി. രാഹുലസംയുത്തേ രാഹുലത്ഥേരസ്സ പുച്ഛാവസേന ആഗതാ. ഇധ രാധത്ഥേരസ്സ സുരാധത്ഥേരസ്സ ച പുച്ഛാവസേന, പാളി പന സബ്ബത്ഥ സദിസാ. തേനാഹ ‘‘വുത്തനയേനേവ വേദിതബ്ബാനീ’’തി.

രജനീയസണ്ഠിതസുത്താദിവണ്ണനാ നിട്ഠിതാ.

അരഹന്തവഗ്ഗവണ്ണനാ നിട്ഠിതാ.