൧. അത്തദീപസുത്തവണ്ണനാ

൪൩. ദ്വീഹി ഭാഗേഹി ആപോ ഏത്ഥ ഗതാതി ദീപോ, ദീപോ വിയാതി ദീപോ ഓഘേഹി അനജ്ഝോത്ഥരനീയതായ. യോ പരോ ന ഹോതി, സോ അത്താ, ഇധ പന ധമ്മോ അധിപ്പേതോ. അത്താ ദീപോ ഏതേസന്തി അത്തദീപാ. പടിസരണത്ഥോ ദീപട്ഠോതി ആഹ – ‘‘അത്തസരണാതി ഇദം തസ്സേവ വേവചന’’ന്തി. ലോകിയലോകുത്തരോ ധമ്മോ അത്താ നാമ ഏകന്തനാഥഭാവതോ. പഠമേന പദേന വുത്തോ ഏവ അത്ഥോ ദുതിയപദേന വുച്ചതീതി വുത്തം ‘‘തേനേവാഹാ’’തിആദി. യവതി ഏതസ്മാ ഫലം പസവതീതി യോനി, കാരണം. കിം പഭുതി ഉപ്പത്തിട്ഠാനം ഏതേസന്തി കിം പഭുതികാ. പഹാനദസ്സനത്ഥം ആരദ്ധം. തേനേവാഹ ‘‘പുബ്ബേ ചേവ…പേ… തേ പഹീയന്തീ’’തി. ന പരിതസ്സതി തണ്ഹാപരിത്താസസ്സ അഭാവതോ. വിപസ്സനങ്ഗേനാതി വിപസ്സനാസങ്ഖാതേന കാരണേന.

അത്തദീപസുത്തവണ്ണനാ നിട്ഠിതാ.