൭-൧൦. അനുധമ്മസുത്താദിവണ്ണനാ

൩൯-൪൨. അപായദുക്ഖേ സകലസംസാരദുക്ഖേ ച പതിതും അദത്വാ ധാരണട്ഠേന ധമ്മോ, മഗ്ഗഫലനിബ്ബാനാനി. തദനുലോമികാ ചസ്സ പുബ്ബഭാഗപടിപദാതി ആഹ ‘‘ധമ്മാനുധമ്മപടിപന്നസ്സാ’’തിആദി. ‘‘നിബ്ബിദാബഹുലോ’’തി അട്ഠകഥായം പദുദ്ധാരോ കതോ, പാളിയം പന ‘‘നിബ്ബിദാബഹുലം വിഹരേയ്യാ’’തി ആഗതം. ഉക്കണ്ഠനബഹുലോതി സബ്ബഭവേസു ഉക്കണ്ഠനബഹുലോ. തീഹി പരിഞ്ഞാഹീതി ഞാതതീരണപ്പഹാനപരിഞ്ഞാഹി. പരിജാനാതീതി തേഭൂമകധമ്മേ പരിച്ഛിജ്ജ ജാനാതി, വിപസ്സനം ഉസ്സുക്കാപേതി. പരിമുച്ചതി സബ്ബസംകിലേസതോ ‘‘മഗ്ഗോ പവത്തിതോ പരിമുച്ചതീ’’തി വുത്തത്താ. തഥാതി ഇമിനാ ഇതോ പരേസു തീസു മഗ്ഗോ ഹോതീതി ദസ്സേതി. ഇധാതി ഇമസ്മിം സുത്തേ. അനിയമിതാതി അഗ്ഗഹിതാ. തേസു നിയമിതാ ‘‘അനിച്ചാനുപസ്സീ’’തിആദിവചനതോ. സാതി അനുപസ്സനാ. തത്ഥ നിയമിതവസേനേവാതി ഇദം ലക്ഖണവചനം യഥാ ‘‘യദി മേ ബ്യാധയോ ഭവേയ്യും, ദാതബ്ബമിദമോസധ’’ന്തി. ന ഹി സക്കാ ഏതിസ്സാ ഏവ അനുപസ്സനായ വസേന സമ്മസനാചാരം മത്ഥകം പാപേതുന്തി.

അനുധമ്മസുത്താദിവണ്ണനാ നിട്ഠിതാ.

നതുമ്ഹാകംവഗ്ഗവണ്ണനാ നിട്ഠിതാ.