൪. ചതുത്ഥവഗ്ഗോ

൧-൪. ഭിന്ദിസുത്താദിവണ്ണനാ

൧൮൦-൧൮൩. ദേവദത്തോ സഗ്ഗേ വാ നിബ്ബത്തേയ്യാതിആദി പരികപ്പവചനം. ന ഹി പച്ചേകബോധിയം നിയതഗതികോ അന്തരാ മഗ്ഗഫലാനി അധിഗന്തും ഭബ്ബോതി. സോതി അനവജ്ജധമ്മോ. അസ്സാതി ദേവദത്തസ്സ. സമുച്ഛേദമഗമാ കതൂപചിതസ്സ മഹതോ പാപധമ്മസ്സ ബലേന തസ്മിം അത്തഭാവേ സമുച്ഛേദഭാവതോ, ന അച്ചന്തായ. അകുസലം നാമേതം അബലം, കുസലം വിയ ന മഹാബലം, തസ്മാ തസ്മിംയേവ അത്തഭാവേ താദിസാനം പുഗ്ഗലാനം അതേകിച്ഛതാ, അഞ്ഞഥാ സമ്മത്തനിയാമോ വിയ മിച്ഛത്തനിയാമോ അച്ചന്തികോ സിയാ. യദി ഏവം വട്ടഖാണുകജോതനാ കഥന്തി? ആസേവനാവസേന, തസ്മാ യഥാ ‘‘സകിം നിമുഗ്ഗോ നിമുഗ്ഗോ ഏവ ബാലോ’’തി വുത്തം, ഏവം വട്ടഖാണുകജോതനാ. യാദിസേ ഹി പച്ചയേ പടിച്ച പുഗ്ഗലോ തം ദസ്സനം ഗണ്ഹി, തഥാ ച പടിപന്നോ, പുന അചിന്തപ്പതിവത്തേ പച്ചയേ പതിതതോ സീസുക്ഖിപനമസ്സ ന ഹോതീതി ന വത്തബ്ബം.

ഭിന്ദിസുത്താദിവണ്ണനാ നിട്ഠിതാ.

൫. അചിരപക്കന്തസുത്തവണ്ണനാ

൧൮൪. കാലേ സമ്പത്തേതി ഗബ്ഭസ്സ പരിപാകഗതത്താ വിജായനകാലേ സമ്പത്തേ. പോതന്തി അസ്സതരിയാ പുത്തം. ഏതന്തി ‘‘ഗബ്ഭോ അസ്സതരിം യഥാ’’തി ഏതം വചനം.

അചിരപക്കന്തസുത്തവണ്ണനാ നിട്ഠിതാ.

൬. പഞ്ചരഥസതസുത്തവണ്ണനാ

൧൮൫. അഭിഹരീയതീതി അഭിഹാരോ, ഭത്തംയേവ അഭിഹാരോ ഭത്താഭിഹാരോതി ആഹ ‘‘അഭിഹരിതബ്ബം ഭത്ത’’ന്തി. മച്ഛപിത്തന്തി വാളമച്ഛപിത്തം. പക്ഖിപേയ്യുന്തി ഉരഗാദിനാ ഓസിഞ്ചേയ്യും.

പഞ്ചരഥസതസുത്തവണ്ണനാ നിട്ഠിതാ.

൭-൧൩. മാതുസുത്താദിവണ്ണനാ

൧൮൬-൧൮൭. മാതുപി ഹേതൂതി അത്തനോ മാതുയാ ഉപ്പന്നഅനത്ഥാവഹസ്സ പഹാനഹേതുപി. ഇതോ പരേസൂതി ‘‘പിതുപി ഹേതൂ’’തി ഏവമാദീസു.

മാതുസുത്താദിവണ്ണനാ നിട്ഠിതാ.

സാരത്ഥപ്പകാസിനിയാ സംയുത്തനികായ-അട്ഠകഥായ

ലാഭസക്കാരസംയുത്തവണ്ണനായ ലീനത്ഥപ്പകാസനാ സമത്താ.