൩. പേസലസുത്തവണ്ണനാ

൨൧൧. ഏതേസന്തി ഏതേസം മഹല്ലകാനം. ന പാളി ആഗച്ഛതി അപ്പഗുണഭാവതോ. ന ച പാളി ഉപട്ഠാതി, ഏകായ പാളിയാ സതി പാളിഗതിയാ തഥാ തഥാ ഉപട്ഠാനമ്പി നേസം നത്ഥീതി വദതി. ന അട്ഠകഥാതി ഏത്ഥാപി ഏസേവ നയോ. സിഥിലധനിതാദിതംതംബ്യഞ്ജനബുദ്ധിം അഹാപേത്വാ ഉച്ചാരണം പദബ്യഞ്ജനമധുരതാ. അതിക്കമിത്വാ മഞ്ഞതി അഞ്ഞേ ഭിക്ഖൂ. ഹീളനവസേന അഭിഭവിത്വാ പടിഭാനസുതേന അത്താനം പസംസതി സമ്ഭാവേതി. മാനസ്സ പവത്തിതായ സഹജാതനിസ്സയാദിപച്ചയധമ്മാ തംസഹഭുധമ്മാ. മാനവസേന വിപ്പടിസാരീ അഹുവാ. മാ അഹോസീതി യോജനാ. വണ്ണഭണനന്തി പരേഹി കിരിയമാനം ഗുണാഭിത്ഥവം. അഖിലോതി പഞ്ചചേതോഖിലരഹിതോ. നിസ്സേസം നവവിധന്തി നവവിധമ്പി മാനം കസ്സചി ഏകദേസസ്സപി അസേസതോ. വിജ്ജായാതി അഗ്ഗമഗ്ഗവിജ്ജായ. അച്ചന്തമേവ സമിതതായ വൂപസമിതതായ സമിതാവീ.

പേസലസുത്തവണ്ണനാ നിട്ഠിതാ.