൨. അരതിസുത്തവണ്ണനാ

൨൧൦. വിഹാരഗരുകോ കിരേസ ഥേരോതി ഏതേന ഥേരോ അത്തനോ സദ്ധിവിഹാരികം വങ്ഗീസം ഓവദിതും അനവസരോ. തേന അന്തരന്തരാ തസ്സ ചിത്തം രാഗോ അനുദ്ധംസേതീതി ദസ്സേതി. സാസനേ അരതിന്തി സീലപരിപൂരണേ സമഥവിപസ്സനാഭാവനായ ച അനഭിരതിം. കാമഗുണേസു ച രതിന്തി പഞ്ചസു കാമകോട്ഠാസേസു അസ്സാദം. പാപവിതക്കന്തി കാമസങ്കപ്പം. സബ്ബാകാരേനാതി സബ്ബേ തദങ്ഗവിക്ഖമ്ഭനസമുച്ഛിന്ദനാകാരേന. യഥാ മഹന്തം അരഞ്ഞം വനഥന്തി, ഏവം മഹന്തം കിലേസവനം ‘‘വനഥ’’ന്തി വുത്തം.

പഥവിഞ്ച വേഹാസന്തി ഭുമ്മത്ഥേ പച്ചത്തവചനം, തസ്മാ പഥവിയം ആകാസേ ചാതി അത്ഥോ. തേനാഹ ‘‘പഥവിട്ഠിത’’ന്തിആദി. ജഗതീതി ച പഥവിയാ വേവചനം. തേനാഹ ‘‘അന്തോപഥവിയ’’ന്തി. പരിജീരതീതി സബ്ബ്ബസോ ജരം പാപുണാതി. സമാഗന്ത്വാതി ഞാണേന സമാഗന്ത്വാതി അത്ഥോ. തേനാഹ ‘‘മുതത്താതി വിഞ്ഞാതത്തഭാവാ’’തി.

പടിഘപദേന ഗന്ധരസാ ഗഹിതാ ഘാനജിവ്ഹാനം പടിഹനനവസേന പവത്തനതോ. മുതപദേന ഫോട്ഠബ്ബാരമ്മണം ഗഹിതം മുത്വാ ഗഹേതബ്ബതോ. ന ലിപ്പതീതി ന മക്ഖീയതി.

സട്ഠി-സദ്ദോ ഛ-സദ്ദേന സമാനത്ഥോതി ‘‘സട്ഠിനിസ്സിതാ’’തി പദസ്സ ‘‘ഛആരമ്മണനിസ്സിതാ’’തി അത്ഥോ വുത്തോ. പുഥൂ അധമ്മവിതക്കാതി രൂപവിതക്കാദിവസേന ബഹൂ നാനാവിതക്കാ മിച്ഛാസങ്കപ്പാ. ജനതായ നിവിട്ഠാതി മഹാജനേ പതിട്ഠിതാ. തേസം വസേനാതി തേസമ്പി മിച്ഛാവിതക്കാനം വസേന. ന കത്ഥചി ആരമ്മണേ. കിലേസവഗ്ഗഗതോതി കിലേസസങ്ഗണികം ഉപഗതോ ന ഭവേയ്യ, കിലേസവിതക്കാ ന ഉപ്പാദേതബ്ബാതി അത്ഥോ. ദുട്ഠുല്ലവചനം കാമപടിസംയുത്തകഥാ.

ദബ്ബജാതികോതി ദബ്ബരൂപോ. നേപക്കേനാതി കോസല്ലേന. നിബ്ബാനം പടിച്ചാതി അസങ്ഖതധാതും ആരമ്മണവസേന പടിച്ച. പരിനിബ്ബാനകാലന്തി അനുപാദിസേസനിബ്ബാനകാലം.

അരതിസുത്തവണ്ണനാ നിട്ഠിതാ.