൧൦. കോകാലികസുത്തവണ്ണനാ

൧൮൧. ദ്വേ കോകാലികനാമകാ ഭിക്ഖൂ, തതോ ഇധ അധിപ്പേതം നിദ്ധാരേത്വാ ദസ്സേതും – ‘‘കോ അയം കോകാലികോ’’തി? പുച്ഛാ. സുത്തസ്സ അട്ഠുപ്പത്തിം ദസ്സേതും – ‘‘കസ്മാ ച ഉപസങ്കമീ’’തി? പുച്ഛാ. അയം കിരാതിആദി യഥാക്കമം താസം വിസ്സജ്ജനം. വിവേകവാസം വസിതുകാമത്താ അപ്പിച്ഛതായ ച മാ കസ്സചി…പേ… വസിംസു.

പക്കമിസ്സന്തീതി ആഘാതം ഉപ്പാദേസി അത്തനോ ഇച്ഛാവിഘാതനതോ. ഥേരാ ഭിക്ഖുസങ്ഘസ്സ നിയ്യാദയിംസു പയുത്തവാചായ അകതത്താ ഥേരേഹി ച അദീപിതത്താ. പുബ്ബേപി…പേ… മഞ്ഞേതി ഇമിനാ ഥേരാനം കോഹഞ്ഞേ ഠിതഭാവം ആസങ്കതി അവണേ വണം പസ്സന്തോ വിയ, സുദ്ധേ ആദാസതലേ ലേഖം ഉട്ഠാപേന്തോ വിയ ച.

അപരജ്ഝിത്വാതി ഭഗവതോ സമ്മുഖാ ‘‘പാപഭിക്ഖൂ ജാതാ’’തി വത്വാ. ആഹ ‘‘സദ്ധായ ആകരോ പസാദാവഹോ’’തി. പവത്തസദ്ധായികോ വാതി അത്ഥോതി ആഹ ‘‘സദ്ധാതബ്ബവചനോ’’തി.

പീളകാ നാമ ബാഹിരതോ പട്ഠായ അട്ഠിം ഭിന്ദതി, ഇമാ പന പഠമംയേവ അട്ഠിം ഭിന്ദിത്വാ ഉഗ്ഗതാ. തരുണബേലുവമത്തിയോതി തരുണബില്ലഫലമത്തിയോ. വിസഗിലിതോതി ഖിത്തപഹരണോ. തഞ്ച ബളിസം വിസസമഞ്ഞാ ലോകേ. ‘‘ആരക്ഖദേവതാനം സുത്വാ’’തി പദം ആനേത്വാ സമ്ബന്ധോ.

മഗധരട്ഠേ സംവോഹാരതോ മാഗധകോ പത്തോ, തേന. തിലസകടം തിലവാഹാഏതി വുത്തോ. പച്ചിതബ്ബട്ഠാനസ്സാതി നിരയദുക്ഖേന പച്ചിതബ്ബപദേസസ്സ. ഏതം ‘‘അബ്ബുദോ’’തി നാമം.

വസ്സഗണനാതി ഏകതോ പട്ഠായ ദസഗുണിതം അബ്ബുദആയുമ്ഹി, തതോ പരം വീസതിഗുണം നിരബ്ബുദാദീസു വസ്സഗണനാ വേദിതബ്ബാ. സബ്ബത്ഥാതി അബബാദീസു പദുമപരിയോസാനേസു സബ്ബേസു നിരയേസു. ഏസേവ നയോതി ഹേട്ഠിമതോ ഉപരിമസ്സ ഉപരിമസ്സ വീസതിഗുണതം അതിദിസതി.

കോകാലികസുത്തവണ്ണനാ നിട്ഠിതാ.

പഠമവഗ്ഗവണ്ണനാ നിട്ഠിതാ.