൧. സമ്ബഹുലസുത്തവണ്ണനാ

൧൫൭. ജടാചുമ്ബടകേനാതി സീസേ പടിമുക്കേന ജടാകലാപേന. അപരിഗ്ഗഹബ്രാഹ്മണപബ്ബജിതാ ഹി ജടായ ഉഞ്ഛാചരിയം ചരന്തി. ഉദുമ്ബരദണ്ഡഞ്ഹി അത്തഗുത്തത്ഥായ ഗഹിതം തേസം അപ്പിച്ഛഭാവപ്പകാസനം. തേനാഹ ‘‘അപ്പിച്ഛഭാവപ്പകാസനത്ഥ’’ന്തി. സീസം ഓകമ്പേത്വാതി ഏത്ഥ അതിവിയ സീസസ്സ ഓകമ്പിതഭാവം ദസ്സേതും ‘‘ഹനുകേന ഉരം പഹരന്തോ അധോനതം കത്വാ’’തി വുത്തം. ജിവ്ഹം നീഹരിത്വാതി ലമ്ബനചാലനവസേന മുഖതോ നിക്ഖാമേത്വാ. തേനാഹ ‘‘ഉദ്ധ’’ന്തിആദി. തിസാഖന്തി തിഭങ്ഗഭകുടി വിയ നലാടേ ജാതത്താ നലാടികം. തേനാഹ ‘‘നലാടേ ഉട്ഠിതം വലിത്തയ’’ന്തി, തിഭങ്ഗവലികം നലാടേ കത്വാതി അത്ഥോ. അത്തനോവ തേലേതി അത്തനോവ പാപകമ്മനിബ്ബത്തകേ തേലേ, പചിതബ്ബട്ഠാനഗേഹേതി അധിപ്പായോ.

സമ്ബഹുലസുത്തവണ്ണനാ നിട്ഠിതാ.