൫. അക്കോധസുത്തവണ്ണനാ

൨൭൧. കോധോ തുമ്ഹേ മാ അഭിഭവീതി ഏത്ഥ കോധേന അനഭിഭവനീയത്തം ഖന്തിമേത്താകരുണാദിതപ്പടിപക്ഖധമ്മപരിബ്രൂഹനേന. തഥാ ഹി തംസമങ്ഗിനോ കോധോ അഭിഭുയ്യതീതി ആഹ ‘‘തുമ്ഹേവ കോധം അഭിഭവഥ. കുജ്ഝന്താനം മാ പടികുജ്ഝിത്ഥാ’’തി. പടിപദാതി ഏസാ പടിപത്തി. മേത്താതി അപ്പനാപ്പത്താ മേത്താ. തദുപചാരോ മേത്താപുബ്ബഭാഗോ. ന വിഹിംസതി കിഞ്ചി ഏതായാതി അവിഹിംസാ. കരുണാതി അപ്പനാപ്പത്തകരുണാ വേദിതബ്ബാ. തദുപചാരോ കരുണാപുബ്ബഭാഗോ. ലാമകജനന്തി ഖന്തിആദീസു യോനിസോമനസികാരാഭാവേന ഗാരയ്ഹസമാചാരസമായോഗേന ച നിഹീനം ജനം. പച്ചയപരിസുദ്ധിയാ കോധോ അഭിമദ്ദമാനോ പുഗ്ഗലം അഭിമദ്ദതി, തസ്സ സോ പടിസങ്ഖാനഭാവനാബലേഹി സമ്മദേവ പഹാതബ്ബോതി.

അക്കോധസുത്തവണ്ണനാ നിട്ഠിതാ.

തതിയവഗ്ഗവണ്ണനാ നിട്ഠിതാ.

സാരത്ഥപ്പകാസിനിയാ സംയുത്തനികായ-അട്ഠകഥായ

സക്കസംയുത്തവണ്ണനായ ലീനത്ഥപ്പകാസനാ സമത്താ.

നിട്ഠിതാ ച സാരത്ഥപ്പകാസിനിയാ

സംയുത്തനികായ-അട്ഠകഥായ സഗാഥാവഗ്ഗവണ്ണനാ.

പഠമോ ഭാഗോ നിട്ഠിതോ.