൮. വേരോചനഅസുരിന്ദസുത്തവണ്ണനാ

൨൫൪. ദ്വാരപാലരൂപകാനി വിയാതി ദ്വാരപാലാകാരേന കതപടിമായോ വിയ. വായമേഥേവ, ന അന്തരാ സംകോചം ആപജ്ജേയ്യാതി അധിപ്പായോ. നിപ്ഫന്നസോഭനേസൂതി നിപ്ഫന്നഭാവേന സുന്ദരേസു. സബ്ബേ ഹി അനിപ്ഫന്നാ അത്ഥാ ന സോഭന്തി. കിച്ചജാതാതി വിപ്പകതഭാവേന സഞ്ജാതകിച്ചാ. അകിച്ചജാതോതി അസഞ്ജാതകിച്ചോ കിച്ചരഹിതോ നാമ നത്ഥി ഗമനട്ഠിതസയനനിസജ്ജാദിവസേന ഉപ്പജ്ജനകദുക്ഖവിനോദനഭാവതോ. സംയോഗപരമാത്വേവ സമ്ഭോഗാതി ഇമേസം സത്താനം സംഭുഞ്ജിതബ്ബവത്ഥൂനി നാമ പകതിയാ വിരോധസീലാനിപി അസംയോഗേന വാ അസുന്ദരാനിപി, താനി അഭിസങ്ഖരണപചനസംയോജനപരമാനി വേദിതബ്ബാനി തഥാ സതി സമ്ഭോഗാരഹഭാവൂപഗമനതോ. തേനാഹ ‘‘പാരിവാസികഓദനാദീനീ’’തിആദി. ഉണ്ഹാപേത്വാ പരിഭുഞ്ജിതബ്ബയുത്തേ പരിഭജ്ജിത്വാതി അധിപ്പായോ.

വേരോചനഅസുരിന്ദസുത്തവണ്ണനാ നിട്ഠിതാ.