൫൪. ഉഭതോബ്യഞ്ജനകവത്ഥുകഥാ

൧൧൬. ഉഭതോബ്യഞ്ജനകോതി ഏത്ഥ ബാഹിരത്ഥസമാസം ദസ്സേന്തോ ആഹ ‘‘ഇത്ഥിനിമിത്തുപ്പാദനകമ്മതോ ചാ’’തിആദി. തത്ഥ ‘‘ഇത്ഥി…പേ… കമ്മതോ ചാ’’തി ഇമിനാ ഉഭയസരൂപം ദസ്സേതി. ഉഭതോ കമ്മതോ പവത്തന്തി പാഠസേസോ യോജേതബ്ബോ. ബ്യഞ്ജനന്തി നിമിത്തം. അസ്സാതി ജനസ്സ. കരോതിപി കാരേതിപീതി ഏത്ഥ കരധാതുയാ സുദ്ധകമ്മകാരിതകമ്മാനി ദസ്സേന്തോ ആഹ ‘‘പുരിസനിമിത്തേനാ’’തിആദി. തത്ഥ ‘‘വീതിക്കമ’’ന്തി ഇമിനാ സുദ്ധകമ്മം ദസ്സേതി, ‘‘പര’’ന്തി ഇമിനാ കാരിതകമ്മം ദസ്സേതി. സമാദപേത്വാതി ഉയ്യോജേത്വാ. തസ്സ ദുവിധഭാവം ദസ്സേന്തോ ആഹ ‘‘ദുവിധോ’’തിആദി. തത്ഥ ഇത്ഥിഭാവേന ലക്ഖിതോ ഉഭതോബ്യഞ്ജനകോ ഇത്ഥിഉഭതോബ്യഞ്ജനകോ. ഏസ നയോ ഇതരത്ഥാപി.

തത്ഥാതി ദുവിധേസു ഉഭതോബ്യഞ്ജനകേസു. ഇത്ഥിനിമിത്തന്തി ഇത്ഥിയാ അങ്ഗജാതം. ഏസേവ നയോ ‘‘പുരിസനിമിത്ത’’ന്തി ഏത്ഥാപി. പാകടം പടിച്ഛന്നന്തി സഭാവതോ പാകടം പടിച്ഛന്നം. പുന പടിച്ഛന്നം പാകടന്തി രാഗവസേന പടിച്ഛന്നം പാകടം. പരം ഗണ്ഹാപേതീതി പരമേവ ഗണ്ഹാപേതീതി അത്ഥോ. ഇദന്തി കാരണം. ഏതേസന്തി ദ്വിന്നം ഉഭതോബ്യഞ്ജനകാനം. കുരുന്ദിയം പന വുത്തം, കിം വുത്തന്തി യോജനാ. തത്ഥാതി ഉഭതോബ്യഞ്ജനകേ. വിചാരണക്കമോതി വീമംസനാനുക്കമോ. ‘‘തത്ഥ വിചാരക്കമോ’’തിപി പാഠോ. വിചാരണക്കമോ ധമ്മസങ്ഗഹട്ഠകഥായ വേദിതബ്ബോ, ഇധ പന കിം വേദിതബ്ബന്തി ആഹ ‘‘ഇദമിധ വേദിതബ്ബ’’ന്തി. തത്ഥ ഇദന്തി നപബ്ബജ്ജൂപസമ്പദകാരണം. ഇധാതി ഇമിസ്സം വിനയട്ഠകഥായം.