൪൨. സിക്ഖാപദദണ്ഡകമ്മവത്ഥുകഥാ

൧൦൬. നാസനവത്ഥൂതി ലിങ്ഗനാസനായ അധിട്ഠാനം, കാരണന്തി വുത്തം ഹോതി. പച്ഛിമാനം പഞ്ചന്നന്തി യോജനാ. ദണ്ഡകമ്മവത്ഥൂതി ദണ്ഡകമ്മസ്സ കാരണം.

൧൦൭. അപ്പതിസ്സാതി ഏത്ഥ ഭിക്ഖൂനം വചനസ്സ പടിമുഖം ആദരേന അസവനം ഭിക്ഖൂ ജേട്ഠകട്ഠാനേ ന ഠപേന്തി നാമാതി ദസ്സേന്തോ ആഹ ‘‘ഭിക്ഖൂ ജേട്ഠകട്ഠാനേ’’തിആദി. ‘‘സമാനജീവികാ’’തി ഇമിനാ അസഭാഗവുത്തികാതി ഏത്ഥ സഭാഗസദ്ദോ സമാനസദ്ദപരിയായോ, വുത്തിസദ്ദോ ജീവികപരിയായോതി ദസ്സേതി. പരിസക്കതീതി ഏത്ഥ സക്ക ഗതിയന്തിധാതുപാഠേസു (സദ്ദനീതിധാതുമാലായം ൧൬ ളകാരന്തധാതു) വുത്തത്താ പരിപുബ്ബോ സക്കസദ്ദോ ഗത്യത്ഥോതി ആഹ ‘‘പരക്കമതീ’’തി. കിന്തീതി കിമേവ. ഇതിസദ്ദോ ഹേത്ഥ ഏവസദ്ദത്ഥോ, കേന ഏവ ഉപായേനാതി ഹി അത്ഥോ. അക്കോസതി ചേവാതി ജാതിആദീഹി അക്കോസതി ചേവ. ഭേദേതീതി ഭേദാപേതി. ആവരണം കാതുന്തി ഏത്ഥ ആവരണസദ്ദോ നിവാരണസദ്ദവേവചനോതി ആഹ ‘‘നിവാരണം കാതു’’ന്തി. യത്ഥാതി യസ്മിം പരിവേണേ, സേനാസനേ വാ. വസ്സഗ്ഗേനാതി വസ്സഗണനായ. (തസ്സാതി പരിവേണസേനാസനസ്സ. ഉപചാരേതി ആസന്നേ). മുഖദ്വാരികന്തി മുഖസങ്ഖാതേന ദ്വാരേന അജ്ഝോഹരിതബ്ബം. ‘‘വദതോപീ’’തി ഇമിനാ വചീപയോഗേന ദുക്കടാപത്തിം ദസ്സേതി, ‘‘നിക്ഖിപതോപീ’’തി ഇമിനാ കായപയോഗേന. അനാചാരസ്സാതി ദണ്ഡകമ്മേ അനാചാരസ്സ. ഏത്തകേ നാമ ദണ്ഡകമ്മേതി ഏത്തകേ നാമ ഉദകാഹരാപനാദിസങ്ഖാതേ ദണ്ഡകമ്മേ. ഇദന്തി യാഗുഭത്താദിം. ലച്ഛസീതി ലഭിസ്സസി. ‘‘ഏത്തകേ നാമ ദണ്ഡകമ്മേ’’തി വുത്തവചനസ്സ യുത്തിം ദസ്സേന്തോ ആഹ ‘‘ഭഗവതാ ഹീ’’തിആദി. ദണ്ഡകമ്മന്തി ദണ്ഡേന്തി ദമേന്തി ഏതേനാതി ദണ്ഡോ, സോയേവ കത്തബ്ബത്താ കമ്മന്തി ദണ്ഡകമ്മം ആവരണാദി. അപരാധാനുരൂപന്തി വീതിക്കമസ്സ അപരാധസ്സ അനുരൂപം. തമ്പീതി ഉദകദാരുവാലികാദിആഹരാപണമ്പി. തഞ്ച ഖോതി തഞ്ച കരണം. ഓരമിസ്സതീതി കായേന ഓരമിസ്സതി. വിരമിസ്സതീതി വാചായ വിരമിസ്സതി. ഉണ്ഹപാസാണേ വാതിആദീസു വാസദ്ദേന അഞ്ഞാനിപി അത്തതാപനപരിതാപനാദീനി കമ്മാനി സങ്ഗണ്ഹാതി.