൯. നവമസിക്ഖാപദം

൧൦൧൫. നവമേ സിപ്പസദ്ദോ പച്ചേകം യോജേതബ്ബോ ‘‘ഹത്ഥിസിപ്പഞ്ച അസ്സസിപ്പഞ്ച രഥസിപ്പഞ്ച ധനുസിപ്പഞ്ച ഥരുസിപ്പഞ്ചാ’’തി. തത്ഥ ഥരുസിപ്പന്തി അസികീളനസിപ്പം. മന്തസദ്ദോപി പച്ചേകം യോജേതബ്ബോ ‘‘ആഥബ്ബണമന്തോ ച ഖീലനമന്തോ ച വസീകരണമന്തോ ച സോസാപനമന്തോ ചാ’’തി. തത്ഥ ആഥബ്ബണമന്തോതി ആഥബ്ബണവേദേന വിഹിതോ പരൂപഘാതകരോ മന്തോ. ഖീലനമന്തോതി സാരദാരുഖീലം മന്തേന ജപ്പിത്വാ പഥവിയം നിഖണിത്വാ ധാരണമന്തോ. വസീകരണമന്തോതി മന്തേന ജപ്പിത്വാ പരസ്സ ഉമ്മത്തഭാവമാപന്നകരണോ മന്തോ. സോസാപനമന്തോതി പരസ്സ മംസലോഹിതാദിസോസാപനമന്തോ. അഗദപയോഗോതി ഭുസവിസസ്സ പയോജനം. ആദിസദ്ദേന അഞ്ഞേപി പരൂപഘാതകരണേ സിപ്പേ സങ്ഗണ്ഹാതി. യക്ഖപരിത്തന്തി യക്ഖേഹി സമന്തതോ താണം. നാഗമണ്ഡലന്തി സപ്പാനം പവേസനനിവാരണത്ഥം മണ്ഡലബന്ധമന്തോ. ആദിസദ്ദേന വിസപടിഹനനമന്താദയോ സങ്ഗണ്ഹാതീതി. നവമം.