൧. പഠമസിക്ഖാപദ-അത്ഥയോജനാ

൯൭൮. ചിത്താഗാരവഗ്ഗസ്സ പഠമേ രഞ്ഞോ കീളനട്ഠാനം അഗാരം രാജാഗാരന്തി വചനത്ഥം ദസ്സേന്തോ ആഹ ‘‘രഞ്ഞോ കീളനഘര’’ന്തി. ചിത്തം അഗാരം ചിത്താഗാരം. ആരാമന്തി നഗരതോ നാതിദൂരആരാമോതി ആഹ ‘‘ഉപവന’’ന്തി. ഉയ്യാനന്തി സമ്പന്നപുപ്ഫഫലതായ ഉദ്ധം ഉല്ലോകേത്വാ മനുസ്സാ യന്തി ഗച്ഛന്തി ഏത്ഥാതി ഉയ്യാനം. പോക്ഖരണിന്തി പോക്ഖരം പദുമം നേതീതി പോക്ഖരണീ. പഞ്ചപീതി രാജാഗാരാദീനി പഞ്ചപി. സബ്ബത്ഥാതി ദസ്സനത്ഥായ ഗമനേ ച ഗന്ത്വാ പസ്സനേ ചാതി സബ്ബേസു.

൯൮൧. ‘‘അജ്ഝാരാമേ’’തിആദിനാ ആരാമേ ഠിതായ ആരാമതോ ബഹി കതേ രാജാഗാരാദികേ പസ്സന്തിയാപി അനാപത്തീതി ദസ്സേതി. താനീതി രാജാഗാരാദീനീതി. പഠമം.