൨. ഉയ്യോജനസിക്ഖാപദം

൨൭൪. ദുതിയേ പടിക്കമനഅസനസാലസദ്ദാനം പരിയായത്താ വുത്തം ‘‘അസനസാലായപീ’’തി. ഭത്തസ്സ വിസ്സജ്ജനം ഭത്തവിസ്സഗ്ഗോതി കതേ ഭത്തകിച്ചന്തി ആഹ ‘‘ഭത്തകിച്ച’’ന്തി. സമ്ഭൂധാതുസ്സ പപുബ്ബഅപധാത്വത്ഥത്താ വുത്തം ‘‘ന പാപുണീ’’തി.

൨൭൬. വുത്താവസേസന്തി വുത്തേഹി മാതുഗാമേന സദ്ധിം ഹസിതുകാമതാദീഹി അവസേസം. തസ്മിന്തി ഉയ്യോജിതഭിക്ഖുമ്ഹി. അത്ഥതോതി വിജഹന്തവിജഹിതഭിക്ഖൂനം അവിനാഭാവസങ്ഖാതഅത്ഥതോ. ഇതരേനാതി ഉയ്യോജകഭിക്ഖുനാ. തത്ഥാതി ‘‘ദസ്സനൂപചാരം വാ സവനൂപചാരം വാ’’തിവചനേ. ഏത്ഥാതി നിദ്ധാരണസമുദായോ, ദസ്സനൂപചാരസവനൂപചാരേസൂതി അത്ഥോ. ‘‘തഥാതിഇമിനാ ദ്വാദസഹത്ഥപമാണം അതിദിസതി. തേഹീതി കുട്ടാദീഹി. തസ്സാതി ദസ്സനൂപചാരാതിക്കമസ്സ. ‘‘വുത്തപകാരമനാചാര’’ന്തി ഇമിനാ ‘‘ന അഞ്ഞോ കോചി പച്ചയോ’’തി ഏത്ഥ അഞ്ഞസദ്ദസ്സ അപാദാനം ദസ്സേതി, ‘‘കാരണ’’ന്തിഇമിനാ പച്ചയസദ്ദസ്സത്ഥം.

൨൭൭. കലിസദ്ദസ്സ പാപപരാജയസങ്ഖാതേസു ദ്വീസു അത്ഥേസു പാപസങ്ഖാതോ കോധോതി ആഹ ‘‘കലീതി കോധോ’’തി. ‘‘ആണ’’ന്തിഇമിനാ സാസനസദ്ദസ്സത്ഥം ദസ്സേതി. വുത്തഞ്ഹി ‘‘ആണാ ച സാസനം ഞേയ്യ’’ന്തി. കോധവസേന വദതീതി സമ്ബന്ധോ. ദസ്സേത്വാ വദതീതി യോജനാ. ഇമസ്സ ഠാനം നിസജ്ജം ആലോകിതം വിലോകിതം പസ്സഥ ഭോതി യോജനാ. ഇമിനാപീതി അമനാപവചനം വചനേനാപീതി. ദുതിയം.