൨. ഉജ്ജഗ്ഘികവഗ്ഗ-അത്ഥയോജനാ

൫൮൬. ഉച്ചാസദ്ദം കത്വാ ജഗ്ഘനം ഹസനം ഉജ്ജഗ്ഘോ, സോയേവ ഉജ്ജഗ്ഘികാ, തായ. ഇതി ഇമമത്ഥം ദസ്സേന്തോ ആഹ ‘‘മഹാഹസിതം ഹസന്തോ’’തി. ഏത്ഥാതി ‘‘ഉജ്ജഗ്ഘികായാ’’തിപദേ.

൫൮൮. കിത്താവതാതി കിത്തകേന പമാണേന, ഏവം നിസിന്നേസു ഥേരേസൂതി സമ്ബന്ധോ, നിദ്ധാരണേ ചേതം ഭുമ്മവചനം. വവത്ഥപേതീതി ഇദഞ്ചീദഞ്ച കഥേതീതി വവത്ഥപേതി. ഏത്താവതാതി ഏത്തകേന പമാണേന.

൫൯൦. നിച്ചലം കത്വാ കായസ്സ ഉജുട്ഠപനം കായപഗ്ഗഹോ നാമാതി ആഹ ‘‘നിച്ചലം കത്വാ’’തിആദി. ഏസേവ നയോ ബാഹുപഗ്ഗഹസീസപഗ്ഗഹേസുപീതി. ദുതിയോ വഗ്ഗോ.